Kai thar lakah Juventus an tlawm

Juventus chu Cristiano Ronaldo chhuah hnua an match hmasa berah an chak lo. Old Lady hi an mikhual Empoli lakah 1-0 in an tlawm a, kai thar team tan hian Leonardo Mancuso chuan chawlhlawk hmain goal awmchhun a khung.

Champion lai Inter Milan erawh an kal fawr zel, an mikhualna ramah Hellas Verona chu 3-1 in an luhchhuah a, match hnih an khelh tawhah point ruk hmuin Lazio nen an point hmuh zat a inang chiah.

Chak nei lo
Massimiliano Allegri-a'n tun hma aia ropui zawk nih tumin Juventus a pan leh a, match hnih an khelh tawh chinah erawh tun hma an phak lo hle - chak an la nei lo; Udinese nen an inhnehtawk hnuah Empoli an ngam lo.

Tlarhmaah Paulo Dybala leh Federico Chiesa te an inkawp a, midfielder Weston McKennie-a'n a thlawp bawk - ball chang tamin inkhel thunun mah se an mamawh ber goal an khung thei lo, bench aṭanga lut Manuel Locatelli-a'n remchang nei mah se goal ban hrulah a pet chhuak.

Leonardo Bonucci leh Matthijs de Ligt te inkawpin a zawnin match hnih chu goal an chhuah ta, team nem leh ṭha lo zawk lakah an goal chhuah dan thlir chuan insiamṭhat an mamawh - captain Giorgio Chiellini uapna an la mamawh tih a lang.

Inzir a ngai
Juventus manager Max Allegri chuan an chak lohna chu inzir nan an hman tur thu a sawi. Italian manager chuan, "Team kan ni tih hriat a ngai, football chu mimal anga khelh tur a ni ngai lo, kan chak lohna aṭang hian insiamṭhat nghal kan tum ang.

"A bul kan ṭan fuh a, kan tihsual awmchhunah erawh goal kan chhuah. Chak la nei lo mah ila kan chiai mai tur a ni lo, squad chhah ṭha tak kan nei a, a fuh lo lai kan siamṭha a nih chuan kan tho chhuak leh thuai ang," tiin a sawi.

Old Lady hian season hmasa khan beisei an phak lo bawk. A zawna season kua zet an kawl tawh Serie A nomawi an chan a, league match hnuhnungah palina ni turin an inpet tling hram - elpui hautak an nei nual avangin thawh chhuah hma a ngai dawn.

Inter chak zel
Manager Antonio Conte leh striker ṭha Romelu Lukaku te chhuak mah se Inter Milan an la kaltluang viau. Simone Inzaghi naute hian an match hmasa zawkah Genoa 4-0 in an sawp tawh bawk, an nomawi humhim turin season bul an ṭan fuh hle.

Inter keeper Samir Handanovic ball pek chhuah fuh lo dawngtu Ivan Ilic-a'n mawi taka chip khumin goal hmahruai a khung. Chlawhlawk lai chuan Inter hi 1-0 in an hniam zawk, second half-ah erawh Lautaro Martinez hmanga si phurh an sut hnuah Joaquin Correa hmangin goal hnih an neih belh.

Kum 45 mi Inzaghi chuan, "Player zawng zawng an khel ṭha vek, a bik takin Correa chungah kan lawm tur a ni. Ani nen hian Lazio-ah season thum hun kan hmang dun tawh, a theihna hi ka ringhlel ngai lo," tiin goal hnih khungtu a dah sang hle.