Goal khung tawpsan thei lo Lewandowski

Robert Lewandowski chuan Bayern Munich tan goal 300 a khung tling der, mellung pawimawh phun tur hian match 333 bak a mamawh lo. Poland international hian Hertha Berlin lakah hattrick siamin Bavarians hi 5-0 in hnehna a chanpui.

Allianz Arena-a inkhelah Bayern lamin a khat mawi tawkin goal an khung deuh reng. Minute ruknaah Thomas Muller-a'n a khung ṭan a, striker Lewandowski-a hattrick siam karlakah Jamal Musiala chuan goal khat a khung ve bawk.

Julian Nagelsmann-a naute hian match thum aṭanga point sarih hmuin pahnihna an ni, hmahruaitu Bayer Leverkusen an phak lohna chu goal difference chauh a ni - pathumna Freiburg pawhin point sarih bawk an nei.

Kum 33 mi Lewy hian Bundesliga match a khelh hnuhnung 16-ah goal a khung vek. Kum 1970 vela Gerd Muller-a'n record a lo siam tawh a zawna match 15 league goal khung chu a rawn khum leh ta chiah a, sulhnu ropui dang a la hnutchhiah belh zel ang.

Inkhel dangah Borussia Dortmund chuan hun tawp dawna Erling Braut Haaland goal hmangin Hoffenheim chu 3-2 in an hneh hram a, harsa takin point thum hlu tak an hlawh chhuak.

Dortmund tana Giovanni Reyna leh England midfielder Jude Bellingham te goal khung chu Christoph Baumgartner leh Munas Dabbur ten an sut, si phurh sut zawhna goal luh hun hi minute 90 a ni tawh.

Point an insem ngei dawn niin a lang hman, mahse Dortmund lamin an nawr chhunzawm a, buai nuaih karah Haaland chuan a ball hmuh chu a rem lai berah hlap lut pawpin a team a chakpui, season kal laia a league goal thum a khungna a ni.