Osaka-i'n a tihsual a pawm

Naomi Osaka chuan French Open aṭanga a inhnukdawk kha a tihsual a nih thu a sawi a, tun hnuah media hmachhawn a ngai a nih chuan harsa pawh ni se hmachhawn zel a tum tawh thu a sawi chhuak.

Japanese star hian rilru lam harsatna a nei a, media hmachhawn a hreh. French Open-ah hnehna a chan hnuin media a hmachhawn duh lo a, hei hi dan kalh a nih avangin pawisa an chawitir - a vawi hnih nana media a hmachhawn lo a nih chuan hnawl (disqualify) theih a ni.

Second round khel loin Osaka hi a inhnukdawk zui a, grass court inelna lian Wimbledon a khel lo zui bawk. Tokyo 2020-ah a lo kir a, tunah chuan US Open khel turin a inpeih leh tawh.

Grand Slam vawi li champion tawh Osaka chuan, "Ngun takin ka ngaihtuah let a, thutlukna ka siam dik lo a ni. Chutih rualin a hunlai kha chuan khatiang aia ṭha khan tih ngaihna dang a awm chuang lo," a ti.

Beiseina a neih thu sawi zuiin Osaka chuan, "Ka vanneihna chu ka kalna hmun apianga thlawptu ka nei ṭha ṭhin hi a ni. Tunah chuan beiseina nen New York lam ka hawi mek, tun hma lama result ṭha ka neih tawhna a nih avangin a sang thei ang thlen ka tum leh ang," tiin a sawi.

Grand Slam pali zinga hnuhnung ber US Open hi August 31 aṭangin Flushing Meadows, New York-ah an khel ṭan ang.