Betis khelmualah Carvajal goal a tawk

Real Madrid tana goal khung khat ve tak Dani Carvajal-a'n goal a khung a, Real Betis khelmualah a team chu 1-0 in hnehna a chanpui - Real hian coach thar Carlo Ancelotti hnuaiah league match thum khel tawhin point sarih an nei ta.

Betis khelmualah Real-in goal an khung lawk thei lo a, an match hnuhnung bera Levante inhnehtawkpuitu team hi point khat nen an haw mai dawn niin a lang hman.

Mahse, minute 61-naah rin loh lam aṭangin Carvajal a inlar a, Spanish defender hian karim Benzema cross aṭanga ball kal chu a volley goal a, Betis lamin a chhanletna tur an nei lo.

Goal luh hmain Benzema-a'n goal khungna remchang nei mah se a chhawr thei lo a, Carvajal-a'n goal a khung hmaa a chance neih chu uiawm taka dansak a ni bawk.

Real Madrid-in Covid-19 vangin sum an hloh nasa a, he hri leng vanga an sum hloh zat hi euro maktaduai 300 a tling nia sawi a ni - hetiang boruak karah hian David Alaba chiah player lakluh an la nei a, Bayern Munich defender hi free transfer-a an lakluh a ni.

Hetihlai hian Paris St-Germain forward Kylian Mbappe nen sawizawm mek an ni bawk a, mahse, an dawrna hmasa pound maktaduai 137 chu French club hian an hnar.

PSG sporting director Leonardo chuan French forward hi an chelh luih loh tur thu a sawi tawh a, chutihrual chuan Real chuan an phalna ang zata an ngam a ṭul thu a sawi tel bawk.

Inrinni zan La Liga inkhel ngaihven hlawh dangah Sevilla leh Elche chu 1-1 in an inhnehtawk a, mualneitu Elche hian minute 11-na lekah Enzo Roco hmangin goal hmahruai khung mah se Youssef En-Nesyri chuan minute 40-naah si phurh sutna goal a khung a, goal dang a lut lo.

Zirtawpni zan khan Valencia chuan 3-0 in Alaves an hneh bawk a, Daniel Wass, Carlos Soler leh Gonçalo Guedes ten goal khat ṭheuh an khung - kum sarih hnua a vawi khat nan mahni muala La Liga match hnih an khelhah a zawnin an chak.

Valencia hian tun season-ah league match thum khel tawhin point sarih an nei a, Real Madrid leh Sevilla te nen an point hmuh zat inangin bul an ṭan ṭha hle.

Nizan khan La Liga club langsar zingah Barcelona leh Atletico Madrid an inlan bawk a, he thu buatsaih a nih lai hian result kan hre hman lo.