England lakah India an mualpho

India-in second Test-a England an hneh hnu lawkah mualpho takin third Test-ah an chak lo. Mualneitu England hi Headingley Carnegie-a inkhelah hian innings khat leh 76 runs-in an chak.

Test match hi vawi nga khelh tur a ni a, fourth Test hi September 2-6 chhung hian Oval-ah khelh a ni ang.

Bul ṭan fuh lo
Ṭhumvawrah India an vannei a, Virat Kohli-a'n vuak hmasak a thlang. England bowler hmaah Indian batsman te an mualpho a, 20 runs siam tling pawh an awm lo. India hian 78 runs chauh an siam.

Opener Rohit Sharma chuan 19 runs a siam a, first innings bika India tana siam tam ber a ni. Ajinkya Rahane-a'n 18 runs a siam ve bawk a, player dang zawngin 10 runs an siam tling lo.

Second Test-a fak hlawh tailenders ho pawh an che chhe hle. Mohammed Shami leh Jasprit Bumrah te runs siam loin an thi a, dem theih erawh an ni lo.

England bowler-te an che ṭha rual a, James Anderson (6/3) leh Craig Overton (14/3) ten wicket thum ve ve an la a, Ollie Robinson leh Sam Curran ten wicket hnih ve ve an la bawk.

Bastman ṭha Root
England batsman erawhin an hun ṭha neih an bawhpelh lo a, opener Rory Joseph Burns leh Haseeb Hameed ten 61 leh 68 runs an siam a, Dawid Malan-a'n 70 runs a rawn siam belh bawk.

Ni hnihna lekah India a chak dawn lo tih a rin theih tawh a, captain Joe Root-a'n century (121) a rawn siam leh bawk avangin mualneitu hian first innings-ah 432 runs tehmeuh an siam. Three Lions hi chak turah an ngaih theih a, engtik hunah nge an chak ang tih chu zawhna awmchhun a ni.

Mualpho tur venna
India-in England run siam zat tluk pha tur ringawt pawhin second innings-ah 354 runs siam a ngai a, chak a beiseiawm tawh loh. Men in Blue tana ṭha ber chu inhnehtawk a ni a, chu pawh chu la harsa tak a ni.

Chutihrualin India an chesual nawn tawh bik lo a, Chesteshwar Pujara-a'n 91 runs a siam bakah Rohit Sharma leh Virat Kohli ten 59 leh 55 runs an siam. Mikhual team hian ni thumna an dam tlang thei a, ni lina erawh an daih ta lo.

Men in Blue hian second innings-ah 278 runs an siam a, an mualpho dan a ziaawm. England tan bat ve kher a ṭul ta lo a, innings khat leh 76 runs in an chak.

India captain Virat Kohi chuan, "Hun rei tak chhung level sang taka khel tawh chuan hetiang thil thleng hi an hrethiam ang. Run kan siam tam tawk lo a, chuvangin thawhchhuah a har a ni. A tawp thlengin theihtawp kan chhuah a, chak beiseiawm tawh loh hnuah pawh bat tir leh hram tumin theihtawp kan chhuah," tiin a sawi.

Third Test
England bt India
England chu innings khat leh 76 runs-in
an chak
Venue : Headingley Carnegie
Ṭhumvawrah India an chak a, vuak hmasak an thlang
Series-ah 1-1 in an inhnehtawk

First Innings
India - 78
Rohit Sharma 19 (105)
Ajinkya Rahane 18 (54)

James Anderson 6/3 (8)
Craig Overton 14/3 (10.4)

England - 432
Joe Root 121 (165)
Dawid Malan 70 (128)

Mohammed Shami 95/4 (28)
Jasprit Bumrah 59/2 (27.2)

Second Innings
India - 278
Cheteshwar Pujara 91 (189)
Rohit Sharma 59 (156)

Ollie Robinson 65/5 (26)
Craig Overton 47/3 (18.3)