West Ham-ah Zouma a kal

France international Kurt Zouma chuan Chelsea chhuahsanin West Ham United a pan. Hammers tan hian season li daih contract a ziak a, a man zat hi pound maktaduai 29.8 a ni.

Kum 26 mi Zouma hian Stamford Bridge-a a cham chhung khan - Premier League nomawi pahnih, Champions League leh League Cup a chawi hman a, tawnhriat a nei ṭha tawh hle.

Blues tan hian hmun nghet chang chiah lo mah se, inelna hrang hrangah match 151 a khelhsak hman. Saint-Etienne, Stoke City leh Everton-ah loan hmangin a intuaihriam tawh - Hammers tan chhawr ṭangkai theih tur a ni ang.

West Ham manager David Moyes chuan, "Kurt hi hun rei tak chhung kan lo enthla tawh a, kan team ti chak thei tur a nih avangin a tir aṭanga kan lakluh tum ngar ngar a ni, kan hnena a rawn kal thei hi a lawmawm takzet," tiin a sawi.