Murray hmabak a hautak nghal dawn
US Open khelh dan tur tih chhuah a ni a, world number 1 hlui Andy Murray hmabak a hautak nghal dawn. Britain tlangval hian duhsak takin wildcard dawng mah se, a hmachhawn tur erawh a thlang thei bik lo.
Murray hian a match hmasa berah seeded pathumna Stefanos Tsitsipas a hmachhawn dawn. Greek tlangval hi tun season hmang ṭha zinga mi a ni a, 2012 US Open champion Murray tan tlak nghal mai a hlauhawm khawp ang.
Kum 34 mi Murray hian Grand Slam title pathum a la tawh a, mahse season thum chhung chu hliam vangin a buai tawh. Tun hnaiah rawn inkhel ve leh hram hram mah se beisei a phak thei lo, US Open-ah pawh beisei a sang dawn lo.
Novak-a kawng
Seeded pakhatna Novak Djokovic erawhin qualifier aṭanga in vaw tling a hmachhawn dawn a, match hmasa lam chu a harsa lo tura ngaih a ni. Amaherawhchu, Serbian star tan hian final kalkawng erawh a awlsam vek dawn bik lo tih a lang.
Djokovic hian fourth round-ah seeded palina Alex de Minaur a hmachhawn thei dawn, quarterfinal leh semifinal-ah Wimbledon finalist Matteo Berrettini leh Tokyo champion Alexander Zverev te a su thei dawn bawk, final lut tur chuan a hausak ve dawn.
Kum 34 mi Djokovic hian a vawi 21 nan Grand Slam nomawi chawi a tum dawn. New York khawpuiah hian a hlawhtling thei a nih chuan, player ropui Roger Federer leh Rafael Nadal te chu major title lak hnem lamah a khum dawn a ni.
Hmeichhe lam
Round tir lamah player inhmachhawn tur langsar an awm lo - champion lai Naomi Osaka chu a kaltluang zel a nih chuan semifinal-ah Aryna Sabalenka nen an inhmachhawn thei dawn a, an chesual viau a nih loh chuan an intawn ngei pawh a rinawm.
World number 1 Ashleigh Barty pawhin hmachhawn tur hautak em em a nei hran lo, Australian star hian final lut tur chuan Karolina Pliskova a paltlang erawh a ngai dawn; player pahnih hi Wimbledon title inchuh tawhtute kha an ni.
Kum 2019 US Open champion Bianca Andreescu pawh season hmasa inlan lo mah se kuminah a inkhel thei ve leh tawh dawn. Canadian nula hi seeded parukna pek niin, hliam nei loa a khel tluang a nih chuan player hlauhawm tur zinga mi a ni ang.