Kulikawn beisei titlemtu Zarkawt

Mapuia Cricket League khelh mekah Zarkawt Lords chuan nimin khan technical rule hmangin Kulikawn CC an hneh a, MCL qualifier 1 an khel dawn chiang.

Zarkawtin hnehna an chan rualin Kulikawn beiseina an tih tawi sak bawk a, eliminator khel turin Kulikawn hi midang result-ah an innghah tel a ṭul tawh.

Lords hian over 20-ah run 113 siamin wicket kua an hloh a, run 28 siamtu G. Lalbiakvela chu run siam hnem ber a ni. Kulikawn tan an target hi awlsam taka um phak theih niin lang mah se over 20-ah run 113 chiah tlinin wicket riat an hloh a, Super Over khelh a ngai.

Super Over-ah meuh pawh team pahnihin run sarih ve ve siamin wicket khat ve ve an hloh a, Technical Rule 5 (a) "Super over-ah score a la inan cheu chuan an inning a boundary vaw hnem zawk chaka puan a ni ang" tih a nih angin boundary vawi 11 vaw chhuaktu Zarkawt chu chakah puan an ni.

Vawiinah inkhel pahnih a awm dawn a, eliminator khel tur tihchianna inkhel a nih dawn avangin a pawimawh ang.

Chawhma dar 9:00-ah qualifier tling chiang tawh Chhinga Veng leh Ramhlun Venglai an inkhel ang a, RVL hian Chhinga Veng hi an hneh a nih chuan net run rate aṭangin RVL leh Kulikawn-a eliminator khel tur zawk zawn a ni ang.

Chawhnu dar 12:30-ah champion lai Chanmarians CC leh beisei tur nei tawh lo CrOM an inhmachhawn dawn a, Chanmarians hian hnehna an chan chuan pathumna dinhmun sawhnghetin eliminator an khel thung dawn a ni.

MCL Qualifier 1-ah hian table hmahruaitu leh pahnihna an intum ang a, a chak zawkin final lutin a chak lo zawk pawn hun ṭha dang an la nei dawn tho.

Table-a pathumna leh palina chu eliminator round-ah an inhmachhawn ang a, heta chak zawk hian qualifier 2-ah pakhatna leh pahnihna inkhela chak lo zawk tum lehin a chak zawkin final an lut dawn a ni.