Lionel Messi-a'n PSG tan match a khel ta
Football khawvelin nghakhlel taka a thlir chu a hmu ta. Lionel Messi-a'n Paris St-Germain tana a match hmasa ber a khel a, a chawr chhuahna Barcelona ni lo club dang tana a match hmasa ber a nih avangin ngaihven a hlawh zual.
Messi inlan ṭan zanah PSG hian Reims chu 2-0 in an hneh a, goal pahnih hi Real Madrid nena sawizawm lai Kylian Mbappe khung a ni. France international forward hi Spanish club lian tan a itawm zual ngei ang.
A boruak
Reims hian an khelmuala an match khelh hnuhnung zawkah Montpellier an mikhual a, entu 6000 vel chauh an awm. Tun ṭumah chuan Messi awmna team an mikhual a, a boruak a danglam ta - stadium a luh an phal zat, 21000 vel chu chu kar tir lamah ticket an hralh zo nghal vek.
Mauricio Pochettino-a'n a player thar a la dim a, bench lamah hun a hman hmasak tir. Khelmual a luh hmain mual sirah a in ti lum (warm up) lai vel ringawt pawh fans lawm tawk a tling tawh. Messi, Messi tiin an au rual dur dur, stadium boruak chu pui tak a ni.
Minute 66-naah Neymar thlakin Messi-a'n khelmual a rap; PSG chauh ni loin Reims fans lam thlengin thawm a ring - Ligue 1 chuan khawvel player piang tawh zinga ropui berte zinga mi a nei miau a, an lawmna boruak thang vel hi a mak hran lo.
Inkhelh banah Remis keeper chuan a fapa leh Messi thlalak dun tir a duh a, a fapa chu Messi pawm tirin amah an thla a laksak. An khingpui player pawhin thla lakpui an chak hle tihna a ni, Messi hmachhawntu an ni kha nakin zela an la sawi duh tur a ni.
Nghah a la ngai
Ballon d'Or vawi ruk dawng tawh Messi-a'n match hmasa ber khel mah se goal erawh a la khung lo, Paris club tana goal khung tur leh a ṭhat dan bera khel chhuak tur chuan a nghah leh rih a la ngai dawn.
July 11 khan Copa America final khelh niin Argentina an champion, a hnu lamah Pathianni zan khan Messi-a'n match a khelh lehna hmasa ber a ni a, inkhel loin a awm rei viau - a ball chan fuh chang erawhin Reims player tan buaipui laih tham a tling zel.
PSG manager Pochettino, "A match hmasa ber a khelh thei kha ka lawm, inkhelh a mamawh a ni. A ṭhat dan berin a la khel chhuak lo, chutih rualin training a nei ṭha a, kar hnih hnuah chuan tun aia ṭha zawk kha kan hmuh ka beisei," tiin a sawi.
International break an nei zui dawn. Messi hi World Cup qualifier khel turin Argentina lamah a kir dawn a, chumi hnuah chuan PSG tan a inlan leh chauh ang - nakkum kum tawpah World Cup a awm dawn avangin Messi-a'n ran inelna a ngaih pawimawh tel a ngai.
PSG an chak vek
Ligue 1 season kal laiah PSG chuan match li an khelh tawh chinah an la chak vek, point 12 hmuin hmahruaitu an ni. An hnuaiah hian point 10 hmutu Nice leh Angers te an awm, champion lai Lille chuan point nga chauh la hmuin 10-na an ni.
PSG manager Poch chuan, "Bul ṭanna ṭha tak a ni, inkhelah chuan hnehna chan hi a pawimawh, a chung bera awm chuan midang um a ngai lo," a ti a, Argentine manager hian season hmasa kha chuan team dang an um avangin a harsat thu a sawi bawk.
Inkhel dangah champion lai Lille chuan a vawi khat nan chak ni hmel an hmu ve ta. Yusuf Yazici leh Jonathan David te goal khat ve ve khung hmangin Montpellier 2-1 in an hneh hram, inelna bul ṭan chauh ni mah se an nomawi an hlawh ngei a rinawm.
AS Monaco pawh Champions League playoff lamah chak lo mah se an insiamṭha. Monaco hian Sofiane Diop-a goal hnih hmangin Troyes lakah 2-1 in hnehna an chang a, point li hmuin 14-naah an inhlangkai ve bawk.