Premier League hmahruaitu Spurs

Tottenham Hotspur chuan Son Heung-min goal hmangin Watford 1-0 in an hneh a, Premier League match thum khelhah chak awmchhun niin league hmahruaitu an ni.

Pathianni zan inkhelah Son-a'n minute 42-naah freekick aṭangin a khung a, South Korean star hian Premier League match 200 a khelhna a ni chiah bawk.

Tottenham Hotspur Stadium-a inkhelah hian Harry Kane-a'n bul a ṭan a, England captain bakah hian Steven Bergwijn, Eric Dier leh Dele Alli ten chance ṭha an hlah vek.

Spurs hian match thum an khelh tawhah goal an la chhuah lo a, chutihrualin Watford lakah hian an tlarhnung a phui tawk lo. Xisco Munoz chuan Spurs tlarhnung tan hna a siam tam a, Juraj Kucka leh Emmanuel Dennis ten hun ṭha an bawhpelh bawk.

Tottenham hian international break zawhah Crystal Palace, Chelsea leh Arsenal te league-ah an hmachhawn dawn a, chak chhunzawm zel a harsa ang.

Chutihrualin tun ṭum hi table chung bera Spurs an awm laia an hmelma Arsenal table mawngphaha an awm vawi khatna a ni. Gunners hian match thumah goal an la khung lo a, point an la hmu lo a, goal kua zet an chhuah tawh bawk.

Pathianni zan inkhel dangah Burnley leh Leeds United te 1-1 in an inhnehtawk. Turf Moor-a inkhelah Burnley-in Chris Wood hmangin minute 61-naah goal an khung hmasa a, Leeds tan Patrick Bamford-a'n minute 61-naah siphurh a sut.