US Open Mipui en bik tur Novak Djokovic

Tennis season kal laia Grand Slam hnuhnung ber US Open chu tukin zing aṭang hian khelh ṭan a ni a, mipa world number 1 Novak Djokovic chu mipui ngaihven hlawh ber tur a ni - September 1, Nilaini zing dar 4:30-ah a match hmasa ber a khel ang.

Djokovic hian Grand Slam nomawi 20 zet a chawi tawh, player ropui Roger Federer leh Rafael Nadal te nen an champion zat a inang - Federer leh Nadal ten US Open an khel ve lo a, seeded pakhatna Djokovic hi a champion a nih chuan major title la hnem ber a ni dawn.

Season kal laiah Djokovic hi dan theih loh ang maiin a kal. Australian Open, French Open leh Wimbledon title a la vek, mahse 'Golden Slam' chu a ni thei dawn ta lo; Tokyo 2020-ah khan Alexander Zverev hneh loin a tla.

Major title pali vawi khata kawl khawm vek theih erawh player ṭha chungchung bikte chauhin an tih theih a ni a, Serbian star erawh hi chuan tun hma pawhin a lo ti tawh, tunah hian record ropui siam leh theihna remchang a nei mek.

Djokovic hian a match hmasa berah Holger Rune a hmachhawn dawn, ani hi qualifying aṭanga in vaw kai niin Grand Slam bikah main draw a khelh vawi khatna tur chauh a la ni, a khingpui tur nen an inthlau khawp ang.

Danish rawlthar Rune chuan, "Mite chuan Djokovic hi champion tura rinkai ber a nihzia an hre vek, kei pawhin ka ring. Mahse, chak ngei tumin ka bei let dawn a, hei leh chen ka thlen tawh avangin tu pawh hmachhawn ila hlau chungin ka khel dawn lo," tiin a sawi.

Federer leh Nadal te bakah champion lai Dimonic Thiem chu hliam vangin a inlan dawn lo. Mahse, season hmang ṭha Zverev, Stefanos Tsitsipas leh Daniil Medvedev te an awm tho avangin Djokovic tan awlsam taka champion ngawt theih chu a ni dawn bik lo.

Hmeichhe singles lamah pawh Serena leh Venus Williams te unau an inlan thei dawn lo. Naomi Osaka leh world number 1 Ashleigh Barty te chu champion tura rinkai an ni dawn, hmeichhe inelna lamah erawh beisei loh result kan hmuh leh ngei a rinawm.