Man United chhan chhuaktu Greenwood

Molineux Stadium-ah Manchester United an khel chhe takzet a, chak lo thei dinhmuna an din hnuah Mason Greenwood-a'n minute 80-naah chakna goal a khung. Mualneitu Wolverhampton Wanderers 1-0 in an chak lo a, an vanduai hle.

Cristiano Ronaldo-a'n England la thleng lo mah se Wolves leh Man United inkhelh ṭum pawh hian boruak a nei der tawh. Kum 36 mi Ronaldo kaihhnawih chi hrang hrang jersey, t shirt, banner leh a lem (lehkhakhawna siam) te hmuh tur a awm a, United fans an phur takzet.

Mahse maw...
Man United phurna belhchhah turin player thar Raphael Varane leh Jadon Sancho ten bul an ṭan a, amaherawhchu player langsar ber chu goalkeeper David de Gea a ni.

Midfield laia awm Paul Pogba a khel ṭha tawk lo a, a kawppui Fred phei chuan Wolves goal nawr a pui emaw tih tur khawpin a khel chhia. Brazilian midfielder hi Wolves player Trincao leh Adama Traore ten an chaih phar hneh hle.

Minute 15 chhung lekin Wolves-in goal thum khung theihna hun ṭha bik an nei a, Raul Jimenez goal khung tur chu De Gea-a'n a dansak. Trincao a ball petin Spanish keeper paltlang mah se Aaron Wan-Bissaka-a'n mak takin a dang hman.

Man United player thar Sancho-a tihsual vangin Joao Moutinho-a'n chance ṭha bik a nei a, goal zawnah a khung lo hlauh. Wolves-in a khat mawi tawkin chance nei reng a, De Gea a khel ṭha takzet.

Second half-ah Trincao-a'n keeper chiah a hmachhawn hnuah goal zawnah a pet thei lo, Barcelona-in a chhuahtir chhan a ngaihruat theih - a hmawr a bawk thei lo. Wolves defender Romain Saiss pawhin United defender thar Varane tauh khalhin De Gea-a'n a dang, hemi per hi Saiss bawkin goal-ah pet leh mah se Spanish keeper hian a dang hman tho!

Danglamna Greenwood
Ole Gunnar Solskjaer-a'n chak beiseiin Edinson Cavani a luhtir a, mamawh chhanna erawh kum 19 mi Greenwood a ni. English forward hian first half-ah pawh ṭha takin goal-ah a pet tawh a, minute 80-naah mual dinglam aṭanga lalutin a ke vei lama a step over hnuah ke dinglamin a pet goal.

Greenwood hian tun season match zawng zawngah goal a la khung vek a, Man United tan a ṭangkai hle. Chutihrualin goal luh danah sawi zui tur a awm. Greenwood hian ball a chan hma hian Pogba-a'n Ruben Neves a tlawh a, VAR hmanga enlet hnuah pawm a ni tho.

Southampton lakah Man United an vanduai a, Wolves lakah an vanneiah a ngaih theih a, chutihrualin Neves hi ball per hnu fea a tluk avangin referee tan goal khung tawh sutna khawp niin a lang lo.

Engtin zel?
Man United hian September 11, Inrinni zan dar 7:30-ah Newcastle an hmachhawn leh dawn a, Ronaldo a inlan theih hmasak ber tur a ni ang. Portugal captain hi a la khel thei lo a nih erawh chuan September 14, Thawhlehni zanah Man United-in Young Boys an tlawh dawn a, Champions League aṭangin Ronaldo hian bul a ṭan thei bawk.

Ole Gunnar Solskjaer-a hoten match thum khelhah point sarih an hmu a, table-ah pathumnaah an awm mek. Chutihrualin Man United hi an chunga awm pakhat zawk West Ham leh an hnuaia awm Chelsea, Liverpool leh Everton te nen point sarih ṭheuh an hmu.

Red Devils hian league match hnuhnung 28 khualmuala khelhah chak loh an tawng lo a, Arsene Wenger hoa Arsenal-in kum 2004-a an siam khualmuala chak loh nei loa khel tluang ber record an khum. Solskjaer-a tan Premier League-a Man United match 100 a enkawlna a nih chiah bawk.