Transfer tingaihnawmtu Mbappe

Zaninah nipui transfer a tawp dawn a, Lionel Messi leh Cristiano Ronaldo te transfer a fel tak avangin Kylian Mbappe a chanchinin ngaihven a hlawh ber. France international forward hi Real Madrid nen sawizawm a ni a, a hmalam hun a chiang lo.

Thil awm dan
Los Blancos hian Mbappe manah hian euro maktaduai 160 an theh chhuak a, PSG-in an hnawl. Spanish club hian kar liam ta Ningani khan an ngamna hi an tisang a, euro maktaduai 170 bakah a chet ṭhat dan a zirin euro maktaduai 10 pek belh an inhuam.

Nimin lamah erawh PSG hian Real Madrid dilna hi an hnawl niin an sawi a, French club hian euro maktaduai 180 pawhin thla 10 chauh contract nei tawh Mbappe hi an chhuah phal lo tihna a ni.

Mbappe hian Real Madrid-a khelh a duh avangin a contract neih lai a pawtsei duh lo a, PSG-in chhuah an phal lo a nih chuan nakkum nipui bazarah a thlawnin a chhuak thei ang.

Nomawi duh PSG
Mbappe hian tun season match li khelh tawhah goal thum a khung tawh a, assist vawi thum a nei der tawh. Pathianni zan khan PSG-in Reims 2-0 in an hneh a, Mbappe hian goal hnih a khung.

Reims an hmachhawn ṭum hian Lionel Messi-a'n Neymar a thlak a, Mbappe hian PSG hi tun transfer-ah a chhuahsan a nih chuan khawvel hmuh châk Messi, Neymar leh Mbappe te inkawp lai hmuh tur a awm dawn lo tihna a ni.

Chutihrualin PSG hian Champions League nomawi chawi ngei an duh a, player ṭha bik Mbappe hi chelh a duh tih a lang. Parisians hian Mbappe hi an chhuah lo a nih chuan contract pawhsei tir tumin theihtawp an chhuah a ṭul dawn a ni.

PSG boss Mauricio Pochettino chuan, "Kan player a ni a, kan zingah a hlim. Player pawimawh tak a ni a, hetiang player kan kawl hi vanneihna a ni. Kan President leh Director te an tumah an chiang a, thuthang leng vel erawh a tam hle," tiin Mbappe kawl chhunzawm a inbeisei thu a sawi.