Manchester United-in Ronaldo an la fel

Manchester United legend Cristiano Ronaldo chuan nimin khan Portugal-ah Old Trafford-a let turin contract a ziak fel a, Portugal khawpui Lisbon-ah medical pawh neih fel vek a ni.

Zirtawpniah kha chuan Man United leh Juventus te Ronaldo chungchangah inremna an la nei chauh a, tunah chuan dan ang thlapin Portugal captain hi Manchester United player a ni ta.

Ronaldo manah hian English club hian euro maktaduai 15 (£12.87m) an seng a, a chet ṭhat dan a zirin euro maktaduai riat (£6.86m) an pek belh ang. Kum 36 mi Ronaldo hian kum 2023 thleng atan contract a ziak.

Ronaldo hmabak
Portugal hian Nilaini zan dar 12:15 hian friendly match-ah Ireland an mikhual dawn a; September 4, Inrinniah Qatar nen friendly match an khel ang.

Match thumna hi September 7, Thawhlehni zan dar 9:30-ah Azerbaijan nen an inhmachhawn dawn. Portugal fixtures thlirin Ronaldo tan kartawpa Manchester United-in Newcastle United an mikhual huna inlan hman hi thil theih a ni.

Engtin zel?
Zaninah transfer a tawp tawh dawn a, Man United-in player an lakluh belh tawh lo a nih pawhin chhuahtir erawh an neih ngei a rinawm. Rawlthar duhawm Amad Diallo chu Feyenoord-ah loan hmanga kal tura ngaih ni mah se Ivorian winger hi a inhliam avangin Dutch club hi an inhnukdawk.

Leeds United-in Man United winger Daniel James an duh nia sawi a ni a, loan emaw a nghet emaw pawh a ni thei ang. Wales international hi Man United chuan pound maktaduai 20 bawr velin an hralh phal rin a ni.

West Ham lamin season liam taa loan hmanga an lak Jesse Lingard an la beisei ve reng a, England international hi Man United-ah hmun pawimawh a chan phak loh avangin chhuak thei dinhmunah a la ding reng bawk.