Jake Paul a chak leh tawh!

YouTuber lar ber pawl tih ngam Jake Paul chuan boxing khawvelah sulhnu duhawm a hnutchhiah zel a, vawi li inhnek a hmachhawna a vawi li chakna ni turin nimin zing khan Tyron Woodley chu split decision (77-75, 75-77, 78-74) in a hneh.

Cleveland khawpuia inhnekah hian round linaah Woodley-a hnek na tak avangin Paul a talbuai hman a, mahse, round riat an inhnek zawh meuh chuan kum 24 mi Jake Paul hi chak zawkah puan a ni ta a ni.

Kum 39 mi Woodley hian boxing-ah tawnhriat a la nei lo. Mahse, MMA lamah erawh fighter lar a ni a, UFC welterweight champion hlui a ni - mahse, YouTuber hmaah a tlawm!

Paul-te inhnek hma hian British boxer Tommy Fury chuan undercard-ah US boxer thar lam Anthony Taylor a hneh a, Paul-a sparring partner a hneh hnuah Paul hi a cho zui.

Vawi sarih inhnek a hmachhawna la chak vek Fury chuan, "Jake ka tih tur chu ka ti a, i tih tur ti ve la, intawng ang," a ti - mahse, Woodley-a'n rematch a duh avangin a nghah leh hret chu a ngai mai thei.

Woodley chuan, "Jake nen hian kan intawn leh a ngai a, rematch ka duh. Hnehna ka chang ngeiin ka hre tlat a ni," a ti a, judge-te thutluknaah a lungawi lo.

Woodley a tawn hmaa knockout hmanga chak vek Jake Paul chuan, "Jake Paul hi ka hmangaih a ni, tih tattoo i chhut chuan kan inhnek leh thei ang," a ti a, Woodley chuan hei hi a pawm!

Jake Paul hian Woodley nena an inhnek aṭang hian dollar maktaduai nga vel chu a hlawh tura ngaih a ni a, a hneh tak Woodley hian dollar maktaduai hnih bawr vel chu a hlawh dawn niin khawthlang media-ten an tarlang.