City-ah Ruben Dias a cham zel dawn

Manchester City fan-ten chanchin lawmawm hriat tur an nei a, Portugal defender Ruben Dias chuan kum 2027 thleng Etihad Stadium-a cham turin contract thar a ziak.

Kum 24 mi defender hian September 2020 khan Benfica aṭangin City hi kum ruk chhung atan a zawm a, a man zat hi pound maktaduai 65 niin a hunlaia City player man to ber a ni.

City-a a season hmasa berah Premier League leh Carabao Cup-ah a champion a, Champions League final a hruai thleng bawk - Football Writers' Association leh Premier League Player of the Season-ah thlan a ni nghal.

Dias chuan, "Ka duhthusam aia sang thlengin City tan ka khel a, he squad ropui taka tel ve theih hi inchhuanna tham a ni. Season hmasaa team hlawhtling taka ka tel ve thei hi ka lawm a, tun season-ah pawh hlawhtlin min tichâk zual hle a ni.

"Tun season mai ni lo, hun lo awm zel tura he club hlawhtlin nana tha thawh ve hi ka duh a ni," a ti a, City-a contract thar a ziah chhan a sawi.

Portugal international hian City-a a contract hmasaah khan kar khatah £90,000 a hlawh nia sawi a ni a, a contract tharah hian a hlawh hi a leta tihpun a nih thu khawthlang media ṭhenkhat chuan an tarlang.

Dias hian season hmasa khan City tan inelna hrang hrangah match 50 a khel a, tun season-ah match li a khel leh der tawh. League match thum an khelh tawhah City hian goal 10 khungin an lamah goal khat a lut a, vawi khat tlawmin vawi hnih an chak.