Giroud leh Abraham ten goal an khung

Chelsea aṭanga Serie A pan striker pahnih Olivier Giroud leh Tammy Abraham te chuan an club AC Milan leh AS Roma tan goal an khung ve ve a, hnehna chan puiin point thum an hlawhchhuahpui bawk.

Jose Mourinho enkawl Roma hian kai thar Salernitana chu 4-0 in an luhchhuah. Roma tan hian Lorenzo Pellegrini-a'n goal hnih a khung bakah Jordan Veretout leh Abraham ten goal khat ve ve an khung a ni.

Portuguese manager Mourinho-a'n Roma a pan chinah Serie A match hnih an khel a, an chak ve ve. Mourinho chuan, "A tir aṭangin kawng engkimah inkhel kan thunun a, khatiangah kha chuan chak loh theih a ni lo.

"Italy-ah ka kir leh thei hi ka lawm, chutah pawh fans dik leh ruhkawl nei Roma ka enkawl avangin a nuam. Palyer ten an theihna zawng zawng Roma tan an hlan a, bench lama ṭhu thlengin an rilru an pe vek," tiin a naute chet vel danah a lungawi hle.

Inkhel dangah AC Milan chuan Cagliari 4-1 in an sawp ve bawk. Season hmasa pahnihna Milan tana Sandro Tonali goal khung chu Alessandro Deiola-a'n sut mah se, chawlhlawk hmain Rafael Leao-a'n Milan tana a khung belh bakah Giroud chuan goal hnihin a chhunzawm.

Blues tana hmun nghet a chan loh avangin Giroud a inkhel tlem a, World Cup qualifier khel tur France squad-ah pawh koh a ni lo hial. Nakkum Qatar World Cup khelh a duh a nih chuan inkhelh tam a mamawh, tunah chuan beiseina a nei thar leh dawn ta niin a lang.

Kum 34 mi Giroud chuan, "Club ropui Milan tan San Siro-ah ngei mai ka khel a, chutah goal ka la khung bawk, hei aia lawmna tur dang hi a awm tawh chuang lo," a ti. Filippo Inzaghi-a hak ṭhin jersey number 9 hatu striker lakah Milan fans lam pawhin beisei an nei sang chhunzawm dawn.

Milan hian tun hnai thla 18 hnua a vawi khat nan San Siro khatin fans an nei thei, hripui leng vanga hun rei tak khawhar taka an khelh hnuin tun hma lam boruak ang an nei leh ṭan, coach Stefano Pioli pawh a phur hle.

Rossoneri coach Pioli chuan, "Thawm ring leh ropui takin min lo hmuak a, engkim mai kha a nih dan tur ang takin a ni leh ta. Min ṭantute hi kan tan chuan chakna hnar pawimawh an ni a, player tichaktu an ni takzet," tiin a sawi.