Barcelona an kal zel - Atletico chak zo lo!
Spanish La Liga a ngaihnawm zel - Barcelona-in 2-1 in Getafe an hneh a, hetihlai hian Atletico Madrid chuan 2-2 in Villarreal an inhnehtawkpui thung.
Barcelona tan Memphis Depay-a'n a chet ṭhat chhunzawmin goal a khung leh ta a, Sergi Roberto chuan goal khat a thawh ve bawk - Getafe tana Sandro goal khungin awmzia a nei phak lo.
Atletico-in Villarreal laka draw result hlawh chhuak turin an khingpui puihna an mamawh a, hun tawp dawna Villarreal defender Aïssa Mandi 'own goal' hmangin an mikhual hi 2-2 in an inhnehtawkpui hram.
La Liga match thum khelh tawhah chak vek thei an awm lo - Real Madrid, Barcelona leh Atletico Madrid ten point sarih ṭheuh an nei a, season ṭantir aṭangin La Liga a ngaihnawm nghal.
A goal hma
Nou Camp-ah Barcelona-in goal khung turin an nghak rei lo a, Jordi Alba cross aṭanga ball kal chu Sergi Roberto chuan second 99-na lekah a tlawh goal a, Getafe an insiamrem hman lo.
Mahse, an mikhualna ramah Getafe an insiamrem vat a, Barcelona player hlui pahnih Sandro Ramirez leh Carles Alena te an in 'one-two' hnuah Sandro-a'n a hmawr bawkin si phurh sutna goal a khung.
Sandro-a'n goal a khung hian minute 18-na lek a ni a, hliam aṭanga lo kir Barca keeper Marc-Andre ter Stegen-a'n tun season-a goal a ven hmasak berah goal chhuah turin a nghah rei a ngai lo hle!
Kum 26 mi Sandro hi Barcelona youth system chhuak niin 2014-16 inkar kha first team tan a lo khel tawh a, goal assist tu Aleñá pawh La Masia chhuak a ni a, kumin nipui transfer khan Barca aṭangin Getafe hi a nghetin a zawm ve chauh.
A hming Depay
Barcelona-in an beisei aia hmain goal an chhuah a, an beisei aia hmain an lamah a lut bawk. Memphis Depay chuan minute 30-naah Barca a zawm chhan a pholang a, Catalan club hi hma a hruai nawnpui.
Depay-a goal khung hi Netherlands tana a khelhpui Frenkie de Jong-a siamsak a ni a, La Liga-ah kum 2009 hnua Dutch player-in a hnampui goal khung tur a siamsak lehna hmasa ber a ni.
Kum 27 mi Depay hian nipui transfer khan free transfer-in Barca hi a zawm a, league match thumah goal hnih khungin assist vawi khat a nei ta der - goal dang khungna remchang a neih erawh a chhawr lo a, Ronald Araujo goal khung chu offside vangin pawm a ni lo bawk.
Barca coach Ronald Koeman-a'n Gavi chu minute 74-naah bench aṭangin a luhtir a, kum 17 mi rawlthar duhawm, Xavi nen khelh dan inang anga an sawi hian senior team tana a match hmasa ber a khel.
Atletico an chelh
Villarreal-in league match hnih zet a zawna draw result an neih hnuin an chak ve tawh dawn emaw an ti a, mahse, hun pek belha an defender Aïssa Mandi 'own goal' vangin Atletico Madrid nen 2-2 in an inhnehtawk.
La Liga champion Atletico khelmualah Villarreal-in goal an khung hmasa zawk a, Manu Trigueros chuan minute 52-naah goal hmahruai a khung. Mahse, Atletico tan Luis Suarez a lo lang ve vat a, goal an chhuah aṭanga minute linaah si phurh sutna goal a khung.
Europa League champion Villarreal-in point thum aia tlema lungawi an tum lo. Championship club AFC Bournemouth aṭanga an lakluh Arnaut Danjuma chuan Spanish club a zawm hnua a goal hmasa ber a khung a, 2-1 a ni.
Minute 90 thlengin goal dang a lut tawh lo a, league match hmasa pahniha draw result ve ve neitu Villarreal an chak mai dawn niin a lang hman. Mahse, Mandi-a'n keeper Gerónimo Rulli man tura ball a tauh chu Argentine keeper hian chesualin a man thei lo a, 2-2 in inkhel a tawp daih!