Old Firm derby Rangers-in Celtic an ngam

Steven Gerrard-a'n Rangers a enkawl hnuah Celtic a ngam chhunzawm zel a, Pathianni zan khan Old Firm derby-ah Rangers hi 1-0 in an chak - Celtic nen an intawn hnuhnung pasarihah Rangers an la tlawm lo a, vawi ruk an chak thei!

Mipui 50,000 chuang lenna Ibrox Stadium-ah fans an khat vek a, Rangers fan-ten an duh ber goal hmu har mah se an hmuh chhun erawh an hmelma Celtic hneh nan a tawk.

Rangers tan Filip Helander chuan minute 66-naah inkhela goal awmchhun hi a tauh lut a, Celtic lamin a chhanletna tur an nei lo - goal luh hmaa Celtic striker Odsonne Edouard-a'n hnai set sawt aṭanga a chance hlah chu a ui khawp ang.

Celtic tan an forward lar thar Kyogo Furuhashi chuan goal khungna remchang nei mah se Old Firm derby-a hmachhawn hmasak berah goal a khung thei lo a, Edouard tana a siamsak lah French forward hian holam takin a hlah.

Rangers tan Alfredo Morelos, Kemar Roofe, Connor Goldson leh Ryan Kent ten an chance neih an chhawr lo vek a, a tawpah erawh an chak ta tho.

Covid-19 vangin Rangers hi coach Steven Gerrard-a'n a ho thei lo a, goalkeeper Allan McGregor leh Jon McLaughlin, captain James Tavernier leh right back Nathan Paterson te an inlan thei lo bawk.

Rangers hi assistant coach Gary McAllister-a'n a ho a, an goal vengtu pawh third choice keeper Robby McCrorie a ni a, heti chung hian Celtic-in point thum an hlawh chhuak thei lo.

Celtic hi league match li an khelh aṭangin vawi hnih an tlawm ta der a, coach thar Ange Postecoglou chu kum 2009-a Tony Mowbray hnua Celtic coach zinga Old Firm derby hmachhawn hmasak bera tlawm nghal awmchhun a ni - a record a duhawm lo hle.

December 2019 hnua fans hmaa Old Firm derby khelh leh hmasak berah hian Celtic fan-ten a hmunah inkhel an en thei lo - a tirah Rangers-in ticket 700 pek remti zet mah se Celtic hian January 2-a Rangers an mikhual hunah ticket an pek ve theih dawn leh dawn loh an sawi chiang thei lo a, Rangers hian an ticket pek tawh sa pawh an la let leh ta a ni.