Nou Camp-ah beiseina nen Chelsea

"Nou Camp-ah thil ropui tak thlentir kan tum dawn," tih hi Chelsea boss Antonio Conte-a'n Stamford Bridge-a Barcelona nen 1-1 a an inhnehtawk hnu lawka a sawi a ni a, Catalan club a hlau lo.

London club hian zanin dar 1:15-ah Champions League last 16 second leg khel turin Barcelona an lenchilh dawn a, Stamford Bridge-ah inkhel thunun chunga 1-1 a an inhnehtawkpui theih avangin Conte-a'n beiseina sang tak a nei hi a mak lo.

Conte-a ṭawng pawrh rualin fimkhur a ngai tel tih a hai lo a, Italian manager chuan, "Mi a tak kan ni lo a, fimkhur leh fing taka kan khelh a ṭul dawn a ni," a ti. Blues-in last 16 lut tur chuan goal an khung ngei a ngai ang.

Messi hmaah Cesc?
Barcelona aṭangin Cesc Fabregas a inzir chhuak a, Catalan club aṭangin Arsenal-a a hming a chher hnuah Barcelona-ah hian kir leh mah se season thum hnuah 2014 khan Chelsea a pan.

Spanish midfielder hian Barcelona khelh dan leh player a hre chiang a, khelhna chance pek a nih chuan Lionel Messi dah 'nil' a tum tur thu a sawi. Fabregas chuan, "Messi dan a harsa ang tih ka ring a, mah se khelhtir ka nih phawt chuan amah dang turin ka theihna zawng zawng ka pe ang," a ti.

Fabregas-a'n Messi dan a tum thu sawi mah se a harsat tur zia a hai lo - Argentine forward hian tun season-ah match 45 a khelh aṭangin goal 35 a khung tawh a, a match hnuhnung pali aṭangin goal nga a khung. Catalan club hian Luis Suarez an la nei tel cheu bawk.

Conte-a 'Plan'
Stamford Bridge-a team pahnih inhma­chhawn hma sakin Conte-a'n fing takin ruahmanna a siam. Eden Hazard chu 'false nine' angin a chhawr a, box pawn aṭanga ball pet thiam Willian chu Chelsea player ten an 'zawn' ber a ni. He ruahmanna hi Conte-a'n a ti fuh a, Brazilian forward hian Blues tan goal a khung.

Conte-a'n inkhelh zawhah, "Box-to-box a Barca hnaih tum chu a atthlak a, 6-0 thlenga tlawm theihna a ni," tiin a ruahmanna a sawifiah a, zaninah pawh ruahmanna fing zawk neih a ṭul dawn tih a hai lo. Blues manager chuan, "Team pahnih hi vawi khat chetsual leka vanduai thei ve ve din­hmunah kan ding a, ruahmanna fing tak siam a ngai dawn a ni," a ti.

Italian manager chuan 'risk' lak tel a ngaih tur thu sawi nghalin, "Khawvela team ṭha ber zinga mi kan tum dawn avangin kan ṭhat dan bera kan khelh a ṭul dawn a, engtiklai pawha goal zawnga kan men a ṭul dawn a ni," a ti a, quarterfinal lut turin goal khung an mamawh tih a hai lo.

Iniesta tel lohna?
March 4-a a inhliam hnuah Barcelona tan Andres Iniesta a la inlan leh lo a, tun hnaiah club training zawm leh tawhin Chelsea hmachhawn thei tura beisei a ni - starting XI-a a tel dawn leh dawn loh erawh tun thlengin thu chiang a la awm lo.

Andres Iniesta awm leh awm loh hian thui takin Barcelona khelh dan tur a hril dawn. Ernesto Valverde game plan-ah kum 33 mi hian hmun pawimawh a la chang reng a, Champions League-ah Liverpool aṭanga an lakluh Philippe Coutinho an chhawr theih loh avangin Europe-a inelna sang berah hian a pawimawh lehzual.

Kum 2009-a UCL nomawi an chawi theih nan Iniesta hian semifinal-ah Chelsea lakah goal pawimawh a khung tawh a, a awm lo a nih chuan Paulinho, Andre Gomes leh Ousmane Dembele te zinga tu emaw berin mawhphurhna hautak an lak a ṭul dawn a ni.