Asia ram club ṭha inelnaah Aizawl FC

Aizawl FC chuan vawiin tlai dar 4:30 hian AFC Cup-a an match hmasa ber an khel dawn a, Maldives National Football Stadium-ah New Radiant an hmachhawn dawn.

Mizo club coach Santosh Kashyap chuan, "New Radiant hian an match hmasa berah hnehna an chang a, team ṭha an ni. Chutihrualin keini pawhin tum kan nei a, Maldives-ah hnehna chan tumin kan zin a ni," tiin chak ngei an tum thu Vanglaini a hrilh.

AFC Cup-ah hian Aizawl FC hi Group E-ah New Radiant bakah Bengaluru FC leh Dhaka Abahani te nen an awm ho a, Bangaleshi club hian an match hmasa berah Ali Fasir-a goal hmangin Maldives club New Radiant hi 1-0 in an hneh. Group khat aṭangin team pakhat chauhin inter zone playoff semifinal an khel dawn a, hei vang hian match hmasa ber aṭanga chak nghal a ṭul dawn a ni.

Aizawl FC hian I League zawh hnuah H. Lalmuan­kima chu FC Goa aṭang­in loan hmangin an la let a, amaherawhchu AFC Cham­pions League playoff khel thei tura inziaklut te chauh chhawr theih an nih avangin Bawngkawn tlangval hi hman theih a ni lo. MK-a hi AIFF buatsaih Super Cup-ah erawh chhawr theih a ni.