Chhinga Veng chhing zo an awm lo

Mizoram cricket-ah Chhinga Veng chuan match 13 chhung hneh loh an tawng tawh lo. Nimin khan 3C hian eliminator khel tura chak mamawh Ramhlun Venglai chu run 26-in an hneh a, RVL tlawm zarah Kulikawn CC-in eliminator an khel dawn thung.

Suaka Cricket Ground-a inkhelah K. Vanlalruata chu a changtupa a ni a, Chhinga Veng batsman hian run 40 ngawt vaw chhuakin Abhay Joshi (25) chuan a thlawp ṭha hle bawk - 3C hian over 20-ah run 129 siamin wicket ruk an hloh.

RVL-in chak ngei an mamawh tih inhre mah se top three batsman zinga pahnih chu run siam loin an out a, Lalṭhakima'n (41) theihtawp chhuahin a team tan sual let mah se over 19-ah run 103 chiah siamin an out vek a, 3C-in table chung berah awmchungin league round an khar.

Nimin inkhel pahnihnaa Chanmarians CC leh CrOM CC inkhel tur chu ruah surin a tihbuai avangin khelh theih a ni lo a, club pahnihin point khat ve vein an insem.

MCL champion lai Chan­marians-in pa­thumna dinhmun luah chungin eliminator an khelh a ngai dawn a, CrOM-in MCL-a an season hmasa berah point khat nen inelna an khar thung.

Qualifier 1-ah Chhinga Veng leh Zarkawt Lords chu naktuk hian an inkhel dawn a, eliminator-ah Chanmarians CC leh Kulikawn CC an inkhel bawk ang.