Federer-a'n last 16 a lut

World number 1 Roger Federer chuan Filip Krajinovic lakah 6-2, 6-1 a hnehna changin Indian Wells Masters last 16 a lut.

Thawhṭanni inkhelah champion lai Federer hian hnehna chang turin minute 58 bak a mamawh lo, a vawi ruk nana nomawi chawi turin kawng dik a zawh mek.

Kum 36 mi Federer hian a match lehpekah chuan Jeremy Chardy a tum dawn. Inkhel dangah French tlangval Chardy hian Adrian Mannarino chu 7-5, 4-6, 6-1 in a lo hneh ve bawk.

Grand Slam vawi 20 chawi tawh Federer hian tun season chhungin Australian Open leh Rotterdam Open nomawi a chawi tawh a, a elpui ber Rafael Nadal chu hliam vanga a chawlh mek avangin champion tura rinkai ber a ni.

Swiss star Federer chuan, "Grand Slam tih lohah chuan Masters 1000 hi ngaih hlut a ni a, inelna dang aiin a awlsam lo hle. Chawlhna hun kan nei tlem a, nitin inkhelh a ngaih avangin tha khek thiam a ngai hle," tiin a sawi.