Man City mawina ti zualtu David Silva United hnehin nomawi chawi thei
Pep Guardiola kaihhruaina hnuai a football hmuhnawm khel mek Manchester City chuan Stoke City lakah 2-0 in hnehna an chang a, Premier League nomawi an hnaih tawh hle–City goal hnih hi midfielder David Silva khung a ni.
Man City hian an league match lehpekah Everton an hneh a nih chuan champion lai Chelsea beiseina a tawp dawn. Man United, Liverpool leh Tottenhman te chiah beisei nei an ni tawh ang. April 7 zan khian Eitihad Stadium-ah Manchester derby khelh a ni dawn a, Pep-a nauten hnehna an chang a nih chuan an champion tawh dawn!
Stoke an hneh hnuah Man City captain Vincent Kompany chuan Manchester United nen an intawn huna nomawi chawi theih chu duhthusam a nih thu a sawi a, "Dam chhungin hetiang hun ṭha hi vawt khat bak a awm thei lo ang," tiin a sawi.
Silva show
Thawhṭanni zan bet365 Stadium-a inkhelah Man City midfielder Silva a langsar ber. Spain international hian minute 10-na lekah hliam dam hlim Raheem Sterling-a cross chu a pet goal a, second half ṭan tirhah Stoke keeper Jack Butland rawn tlan chhuak dan hman lohin rang zetin a khung bawk.
City midfielder Fernandinho leh Leroy Sane ten goal khung belh theina hun ṭha nei mah se a vannei tawk lo. Stoke defender Bruno Martins Indi-a pawhin hnai tak aṭangin a thlawh out bawk.
Potters tana midfielder Badou Ndiaye ball pet chu defender Kyle Walker-a'n an mahni lamah a dang pial lut teuh hle, keeper Ederson-a'n harsa takin a nem chhuah sak hman hlauh–khualmualah City goal a him.
Striker rinrawl Sergio Aguero inhliam mah se player dang inhliam an dam tawh. Brazil international Gabriel Jesus, Sterling leh Leroy Sane te an in man leh nghal a, anni khaikhawm tur hian David Silva leh Kevin De Bruyne an la nei tel bawk–an match lehpeka an khingpui tur Everton leh Man United tan hmachhawn chakawm tak an ni lo khawp ang.
Nikum October thla khan City hian Stoke lakah 7-2 in hnehna an chang tawh bawk, 1998-99 hnuah season khat chhunga league match vawi hniha an hneh zawn lehna hmasa ber a ni, hetih hun lai hi chuan third division club ve ve an ni.
Nomawi a hnai
Manchester City hian Premier League match 30 khelh aṭangin point 81 an hmu tawh a, season hmasa chhung zawnga an hmuh (78 points) aiin a tam zawk; nomawi chawi turin match hnih bak chak an mamawh tawh lo.
City manager Guardiola chuan, "Kan champion hnai tawh, match hnih emaw match thum hnuah emaw pawh a ni thei. Nomawi kan chawi a nih chuan eng hun pawh ni se a hun chu a pawimawh ber a ni lo," tiin Manchester United hneh chung ngeia nomawi chawi chu an tum ber a nih loh thu a sawi.
Kar tawp hian FA Cup khelh tur a ni a, Pep-a naute hi an tlak tawh avangin chawlh kar thum chhung chawlh an nei dawn; Abu Dhabi-ah intuai tharna hun an hmang dawn, March 31 zanah Everton an lenchilh dawn a ni.
Stoke an ral?
Paul Lambert-a nauten a zawnin match ruk chhung chu chak ni hmel an hmu thei ta lo. Point 27 chiah an la neih avangin a hniam ber dawtah an awm a, dinhmuna him chin chiaha awm Southamton an phak lohna chu point khat chiah a ni thung.
A zawna season 10 chhung Premier League khel tawh Potters hian an dinhmun siam ṭha turin match riat an la nei. Mahse, an hmabak a awlsam dawn lo hle; Emirates Stadium-ah Arsenal an tlawh dawn a, Liverpool leh Tottenham te pawh an kawngah an la awm.
Kumin chhunga league match khat chiah hnehna la chang Lambert chuan, "City kan hmuh ṭhin ai khan an lo ṭha zual leh tawh, kan dinhmun a inang lo em a ni. Chutih rualin ka naute ka dem lo, minute 90 chhung khan an beidawng lo a ni," tiin a sawi.