Serena chungah Venus Williams

Tennis khel thiam hmingthang unau Williams inkhelah Venus chuan a nau Serena hnehin Indian Wells last 16 a lut. World number 2 Caroline Wozniacki pawhin hnehna a chang ve bawk.

Nimina inkhelah Venus hian world number 1 hlui Serena hi 6-3, 6-4 in a hneh. American nula Venus hian bul a ṭan fuh lo hle, service hmasa zawkin double faults a nei nghal. Mahse, set hmasa berah insiamṭha nghalin buaina a tawk zui lo.

Kum 37 mi Venus chuan, "Serena aiin tun hnaiah chuan ka inkhel tam zawk a, ka vanneihpui niin ka hria. Unaua inkhelh chu engtik lai mahin a awlsam ngai lo, tun ṭumah pawh khan match a tawp hma kha chuan awm dan thiam a har ṭhin hle," tiin a sawi.

American unaute hi vawi 29 an intawnna chiah a ni a, a naupang zawk Serena hian record nei ṭha zawkin vawi 17 hnehna a chang, tun hnai an intawn hnuhnung vawi kuaah Venus hian ṭum hnih chiah hnehna a chang. Indian Wells hmaa an inkhelh hnuhnung ber chu 2017 Australian Open final kha niin Serena hian a vawi 23 nan Grand Slam nomawi a chawi.

Inkhel dangah world number 2 Caroline Wozniacki chuan Aliak-sandra Sasnovich chu 6-4, 2-6, 6-3 a hnehin third round a paltlang ve bawk. Australian Open champion lai Wozniacki hian US Open champion Sloane Stephens leh seeded 20-na Daria Kasatkina te inkhela chak zawk a hmachhawn leh ang.