Powerlifting-a India aiawh tur Chama

Mizo pachak P. Lalcham-liana chu World Classic Powerlifting Championship-a India aiawh tura thlan a ni. Inelna hi Calgary, Canada-ah June 5-17 hian neih a ni ang.

Kum 40 mi Chama hi Mizoram pachak thlan hnuhnun ber ṭum kum 2011-ah khan pakhatna a ni a, North East India Powerlifting Championship 2018 neih zawh takah khan 120 kg-ah gold medal a la bawk. Lunglei pa chak Chama hi Mizo powerlifter zinga India aiawh hmasa ber tur a ni a, master category 1-ah a inlan ang.

March 10-11 khan Silchar, Assam-ah NE C'ship hi neih a ni a, Mizoram chuan medal 11 an la a, team champion an ni. Mizoram hian mipa lifter 13 tir chhuakin gold paruk, silver leh bronze pahnih ve ve an la a, hmeichhe pahnih kal zinga pakhat zawk chuan gold medal a la ve bawk.

Mizoram team hi manager Theophile Lallawmzuala, Khatla South leh coach Lalsangliana, Upper Republic chuan an hruai a, Mizoram Powerlifting Association aṭangin official panga an kal ve bawk.