Bayern Munich-in an la ngai thutak

Zanin dar 10:30 hian Bayern Munich-in Vodafone Arena, Istanbul-ah Besiktas an lenchilh dawn. German champion hian Allianz Arena-ah 5-0 in Turkish club hi an hneh tawh a, Champions League quarterfinal thleng turin hna harsa a awm tawh lo.

Hetichung hian Bayern player-te erawhin inelna an la thu tak hle. Thomas Muller chuan, "Istanbul-ah hawi thoveng turin kan kal dawn lo a, 1000% in kan la ngai thu tak a ni," tiin a sawi a, German forward hi Thawhṭanni khan Arjen Robben, Robert Lewandowski, Franck Ribery leh David Alaba te nen mimala training tir an ni.

Besiktas nena first leg an khelh ṭum hian Muller hian goal hnih a khung a, hetiang zat bawk hi Robert Lewandowski-a'n khung ve bawkin Kingsley Coman-a'n goal khat a khung a, keeper Sven Ulreich-a'n goal a chhuah lo.

Dutch winger Robben pawhin, "Turkey-a kan inkhel tur hi 0-0 ang thoin kan hmachhawn ang. Football-ah chuan engpawh thleng thei a ni a, 5-0 hi dinhmun ṭha tak ni mah se a la him bik lo," tiin a sawi.

German defender Mats Hummels chuan, "Instanbul-ah stadium boruak a nung ṭha ṭhin a, hetiang hmuna chak hi kan duh a ni," tiin chak nawn leh an tum thu a sawi ve bawk.

Bavarians hian an match hnuhnung paliah goal an chhuah tawh lo a, match hnuhnung pahnihah ringawt pawh goal 10 an khung tling. Match hnuhnung bera Hamburger SV 6-0 a an sawp ṭumin Robert Lewandowski chuan hattrick a siam.

Polish striker Lewandowski hian Bayern tan Bundesliga-ah goal 100 a khung tling tawh a, foreign striker zinga inelna hrang hranga goal khung tam ber a ni bawk.