Minerva-in Super Cup khelh tulna hre lo
I League champion Minerva Punjab neitu Ranjit Bajaj chuan All India Football Federation (AIFF)-in I League leh Indian Super League club te inelna tura an buatsaih Super Cup chu nasa takin a sawisel a, sum lama hlawkna an tel loh avangin tel loh hial an tum thu a sawi.
Ranjit Bajaj chuan, "Super Cup-ah chuan vawi khat pawh chesual ila, kan tla nghal a. Chutihrualin player-te erawh thla hnih hlawh kan pek a ṭul dawn. Kan zinna leh thlenna senso tur kan tum a ngai dawn tih te ka hre lehzel a, kan tlin lo a ni. Mawlmang taka ka chhut dan chuan nuai 40 vel kan seng thlawn dawn tihna a ni," tiin a sawi.
Minerva neitu Ranjit chuan sawi chhunzawmin, "Final khel turah inngai ta ila, kan sum sen tura ka chhut dan chu nuai 55-60 bawr vel a ni a, chu chu kan budget aṭanga 50% a ni. Kan tan chuan theih ngaihna a awm lo a, AIFF hnenah kan tlin loh thu hi ziakin ka thlen dawn.
"Tunah hian ka player-te hi ni 10-15 chhung chawlh hmangin an haw mek a, chutichung chuan an hlawh ka pek a ṭul dawn tihna a ni. Hei hi club tan thil ṭha a ni lo a, pumpelhna zawn a ṭul. Hei bakah hian inkhelhna tur hmun Bhubaneswar lum zawng chu April thlaah chuan 45 degree celsius te a ni dawn a, ISL club ten an sawisel ve ang a, AIFF lamin harsatna an tawk khawp ang," tiin a lungawi loh thu uar takin a sawi.
Punjab club hian I League-ah an champion avangin season tharah AFC Champions League preliminary playoff an khel dawn a, an tling zo lo a nih pawhin AFC Cup an khel dawn. Ranjit chuan, "Asia khawmualpui inelna kan thlir tawh a, Super Cup hi chu kan ngaihtuah lo tawp. Season tharah India ram ai kan awh dawn a, chu chu kan ram chhunga inelna aiin kan ngai pawimawh zawk a. AFC Champions League qualifiers-ah history siam ngei kan duh a ni," tiin a sawi.
Super Cup hi March 15 aṭangin Bhubaneswar, Odisha-ah khelh ṭan tur a ni a, Minerva neitu thusawi chungchangah hian AIFF chuan thuchhuah an la siam lo. Fixture-a a lan dan chuan Punjab club hian ISL club Jamshedpur an hmachhawn dawn.
Vanglaini chuan hemi chungchangah hian Minerva coach Khogen Singh chu a bia a, Manipur coach chuan, "Chawlh hmangin ka haw mek a, ka hriat chin chu club neituin sum dinhmun vangin tel an duh lo tih hi a ni a. Engmah thuchiang a la awm lo a, sawi belh theih ka nei lo," tiin a sawi.