Mohun Bagan official an bang

Kolkata club lian Mohun Bagan official pahnih Debashish Dutta leh Srinjoy Bose te chuan banna an thehlut. Srinjoy hian Bagan-ah hian club assistant secretary hna a chelh a, Debashish hi finance secretary a ni thung.

Srinjoy chuan, "Mohun Bagan-a kan nihna aṭangin kan bang tih kan puang a, club chhungah buaina neuh neuh a awm avangin harsa ti tak chungin thutlukna hi kan siam a ni," an ti a, anmahni thlaktu turte tan pawh harsatna a awm loh tur thu an sawi.

Debashish Dutta leh Srinjoy Bose te hi Bagan-in player an lakluh chungchanga thuneitu ber leh nitina Kolkata club viltu ber an ni a, club general secretary Anjan Mitra nen an inmil lo niin sawi a awm.

Srinjoy Bose-a pa hi Tutu Bose tia hriat lar Swapan Sadhan Bose a ni a, ani hian season hmasa khan club president a nihna aṭangin banna a lo thehlut tawh. Bagan hian Nepalese winger Bimal Gharti Magar chu an chhuah zalen bawk.