India-in Sri Lanka an hneh

Nidahas Trophy khelh mekah India chuan Thawhṭanni zan khan Sri Lanka chu wicket rukin an hneh. Men in Blue hian zanin dar 7:00-ah Bangladesh an hmachhawn leh ang a, hnehna an chan chuan final an lut chiang ang.

R. Premadasa Stadium, Colombo-a inkhelah Sri Lanka an bat hmasa zawk a, ruah surin inkhel a tihbuai avangin over 20 khelh turah over 19-ah tih tawi a ni. Sri Lanka hian over 19-ah run 152 siamin wicket kua an hloh a, run 55 siamtu Kusal Mendis chu batsman che ṭha ber a ni.

Indian bowler zingah Shardul Thakur chu che ṭha ber a ni a, over li a vawmah run 27 chiah pein wicket li a la.

Men in Blue bat hun a thleng a, opener pahnih Rohit Sharma (11 runs) leh Shikhar Dhawan (8) te an chet chhiat avangin India dinhmun a him lo hman. Mahse, Manish Pandey (42) leh Dinesh Karthik (39) ten a tawp thlenga rawn bat-in India an chhanhim.

India hian over 17.3-ah an target hi umphain wicket li chiah an hloh a ni.