Mizo Sniper-in Goa a kap thlu
Jeje Lalpekhlua - Mizo Sniper tiha hming lem pek chuan match ruk chhung goal a khung loh hnuah goal a khung ve leh ta a, Chennaiyin FC chu Indian Super League final khel turin a hruai thleng.
Nilaini zan khan Chen-naiyin FC chuan ISL semifinal second leg-ah FC Goa chu 3-0 in an sawp a, inkhel hmasa nen belhkhawma hnehna an channa zat chu 4-1 niin Jeje-a'n goal hnih a khung a, Dhanpal Ganesh chuan goal khat a tauh lut ve bawk.
Jeje bakah Chennaiyin tan Jerry Lalrinzuala a inlan bawk a, Bethlehem rawlthar hi tlarhnungah Chennaiyin tan a khelh ṭhat avangin Emerging Player of the Match-ah thlan a ni.
Coach rinna
English coach John Gregory-a'n Mizo tlangval Jeje-a chungah rinna a nghat tlat a, Aston Villa boss hluiin a ring sual lo–minute 26-na lekah Jeje-a'n goal hmahruai a tauh lut a, minute 90-naah striker zia dik tak chhuahin goal ṭha zet a khung bawk.
Jeje chuan, "Goal ka khung loh lai pawhin ka chungah rinna a nghat tlat a, 'Team tan ṭha takin i khel a, goal chu a lo kal mai ang' tiin min fuih ṭhin. Hei hian inrintawkna nasa tak min siam a ni," tiin Queens Park Rangers boss hlui chunga a lawm thu Vanglaini a hrilh.
Portsmouth leh Derby County boss hlui Gregory chuan, "Jeje hi tlarhmaah a mal tlat avangin goal a khung lohin sawi a hlawh ṭhin a, mah se a thawkrim em em reng a ni. Zaninah pawh theihtawp a chhuah a, hliam tenau a neih phah hial. A tan ka ding reng a, ka team tana khel reng turin ka duh a ni. Chance nei thei dinhmunah a ding reng tih ka hria a, ka beisei ang ngeiin goal hnih a khung a ni," a ti.
Chhetri vs Jeje
Khawvel football-ah Lionel Messi leh Cristiano Ronaldo khaikhin an ni ṭhin a, Indian football-ah Sunil Chhetri leh Jeje Lalpekhlua khaikhin an ni thung.
Sunil Chhetri-a'n match 20 a khelh aṭangin goal 13 a khung tawh a, Jeje-a'n match 19 aṭangin goal kua a khung thung. Chhetri-a'n semifinal-a hattrick a siam khan Mizo tlangval thui takin a tlansan dawn niin a lang hman a, mah se Jeje-a'n 'big game' player a ni ve tho tih pholangin goal hnih a khung ve zui.
March 17 zanah player pahnih an intawng dawn a, Indian football ngainatuten he hun lo thleng tur hi nghakhlel takin an thlir. Jeje chuan, "Goal khung ngei chu a châkawm khawp mai. Pathian thu thu a ni e," tiin final-a goal khung a tum thu Vanglaini a hrilh.
South Indian derby
Bangalore khawpuiah final khelh a ni dawn a, South Indian club pahnihin Indian champion nih an inchuh tur hi football ngainatuten an hmu châk. League round-ah team pahnih hi vawi hnih an intawng tawh a, vawi khat ve ve an chak.
Chhetri-a'n Chennai club lamah goal hnih a khung tawh a, Jeje-a'n goal khat a khung a, penalty a pet goal lo bawk. Hnahthial tlangval chuan, "Bengaluru lama ka penalty pet goal loh kha ka rilruah a cham reng a, hmachhawn leh ngat hi ka châk a ni.
"Ka ṭhiante pawhin Bengaluru hmachhawn nawn an châk a, semifinal-ah khan tum kan chak hial. Mahse, final-ah zawk kan hmachhawn dawn a, kan phur tawh takzet a ni," tiin Vanglaini a hrilh a, South Indian derby boruak a 'hot' dawn.