MSL4 Judgement Night : Zarkawt BCA Vs Khatla TBL
Kan nghak chhuak ta, zanin dar 8:00 hian Zarkawt BCA leh Khatla TBL an khel dawn. Mizoram Super League Season linaa final khel tur zawnna aia hmuhnawm tur hi tualchhung basketball-ah chuan a awm chuang lo a, Hawla Indoor Stadium pan hun a ni.
MSL4-ah Tuikual South chuan Mission Veng Vikings 2-0 a hnehin final an lut tawh a, zanin hian TKS khingpui tur hi zawn a ni dawn. BCA leh TBL te game hmasa pahnihah vawi khat ve ve an chak a, zanin hi game 3 leh a tawpna tur a ni.
BCA an thiam zawk!
Zarkawt BCA hian league round-ah an khingpui an hnek vek, hei chauh hi ni loin semifinal game-ah H. Laldinsanga telna Khatla TBL chu 73-67 in an hneh. Final thleng turin match khat chauh ngai tawh mah se game 2-ah 62-59 in an chak lo a, point thum vang hian zaninah inkhel hau tak zawk an hmachhawn a ṭul dawn.
BCA coach Lalruatfela chuan, "Game 2 kha kan vanduai zan a ni a, basket kan neih ngeina turah kan hlah hnem hle. Hun tawp lam second 34 chhung khan point 7 kan pe a, keini aiin an vannei zawk a ni. Inkhel kha uluk taka chik chuan kan ṭha zawk tih an hmu thei ang a, kan passing game thlengin a ṭha zawk a ni," tiin an vanduai vanga chak lo an nih thu Vanglaini a hrilh.
Zarkawt club hi an vanduai a nih chuan a zawna vawi hnih chak loh hi a thiang lo. Coach Afela thusawi dikna lantir turin a player-te an pawimawh dawn a, BCA player zinga MSL nomawi chawi tawh Lalrina Renthlei chu mawhphurna la tur zinga mi a ni.
Tuikhuahtlang tlangval Lalrina bakah MVP ni pha thei tur khawpa tun season-a khel ṭha Dennis Lalmuanpuia'n a theihna a phochhuah a ṭul. Game 2-ah veteran player Lalrinkima a khel ṭha a, amaherawhchu amah ang bawka Saron Veng tlangval Mapuia angin chak duhna thinlung a ngah tawk lo.
BCA-in theihna nei sang Zonunsanga, Matthew Sailo leh Henry Lalramngaihawma te an kawl a, amaherawhchu boruak sangah an theihna angin an khel chhuak lo leh ṭhin a, an rilru put hmang an thlak a ṭul a ni.
Zarkawt coach Afela chuan, "Game 3 khel turin kan inpeih tawh a, fitness chauh ni loin kan rilru pawh a inpeih tawh. Hnehna kan chan theih nan Zarkawt mipui leh veng hrang hrang BCA ṭantute kan inkhel en turin kan sawm a ni," tiin Khatla TBL an hlauh loh thu Vanglaini a hrilh.
Kan huaisen zawk–Mapuia
Khatla TBL-in MSL4 semifinal thleng turin palina an ni pha ṭawk a, hei hi Mapuia tel loa an dinhmun a ni. Amaherawhchu Saron Veng tlangval Mapuia awm hnuah champion tura Zarkawt BCA ringtu an tlahniam a, Khatla TBL-in a vawi thum nana MSL nomawi an chawi theih ringtu an pung.
Zarkawt BCA lamin TBL an vanneih zawk thu an sawi laiin Khatla coach Mapuia chuan, "Kan huaisen zawk a, pressure sangah kan ṭha zawk. Tunah chuan team boruak a ṭha leh tawh a, final thleng turah kan inngai," tiin Vanglaini a hrilh a, Khatla mipui tan inkhel en a châkawm sawt.
TBL tana chanchin lawmawm loh awmchhun erawh Gospel Lalthawmmawia a inhliam a, he thuziah lai hian a dinhmun a la hriat loh. Chutihrualin MSL nomawi vawi hnih chawi tawh TBL squad a ṭha a, player pakhat vangin an buai a rinawm lo ang.
MSL1 MVP Mapuia chuan, "Kum te a upa ve ṭan a, tun hmaa kan tih ang zawng zawng kan ti thei tawh lo. Amaherawhchu hmahruaitu ni tur hian zamna hi kan la nei chhin lo a, mawhphurtu nih hi ka la châk zek zek a, chutihrualin chak tur chuan team anga ṭanrual a ṭul a ni," tiin a sawi a, inkhel bul a ṭan leh ngei dawn tih a hriat theih.
Khatla TBL hian player hmuh-nawm Vanlalṭhazuala an nei a, player ṭangkai Vanchuangpuia te chu an hmachhuan tur an ni leh dawn. Inkhel entu ni lo, a teammate-ten an fak ṭhin an kawl bawk a, a hming chu R. Lalmalsawma a ni a, ani hi lang lo lama ṭangkai a ni.
Coach Mapuia rawn let hnuah a hmaa thiam sa Vanlalmuana, Nelson Lalrohlua leh Eddie Zaithanmawia te an rawn langsar leh tawh a, game 3-ah tu nge pawimawh dawn tih erawh hunin a hril ang.
A hmuhnawm dawn
Khatla TBL leh Zarkawt BCA inkarah ṭha zawk an awm lo, chak zawk tur chu zaninah chauh a chiang dawn. Game 2-ah second 39-naah TBL-in time out an la a, an set play fuh leh vanneihna ṭangkawpin hnehna an chang.
Game 3 pawh a lan dan mai chuan second tawp dawn thlengin chak zawk tur an zawn a rinawm. Zarkawt lamin Mizoram pum huapa an veng hming tih ṭhat nan an veng club BCA hi an ṭawiawm ṭhat a ṭul a, Khatla TBL tan kumin hi a lungthu kimna a nih theih miau avangin ngaihthah a thiang lo.
BCA leh TBL hi player aṭanga thlir chuan semifinal pakhat zawka inhmachhawn Mission Veng leh Tuikual South aiin an ṭha zawk niin a lang a, amaherawhchu entu lam aṭanga thlir chuan tun season-ah an tluk lo. Zanin hian Zarkawt leh Khatla hian an nep bik lo tih an pholan a ṭul ang.