Mualpho takin United an tla : Mourinho-a'n inchhirna a nei lo

Manchester United chu Liverpool an hneh avanga 'lal lenna' an len laiin Sevilla-in an suangtuahna khawvel aṭangin an beng harh - La Liga club vantlang hian English club hi UEFA Champions League aṭangin an pet chhuak.

Jose Mourinho hote hian khualmuala goal an khung loh hnuin Thawhlehni zan inkhelah attacking game an la khel ngam chuang lo. Sevilla-in substitute Wissam Ben Yedder hmangin goal hnih an khung a, United tana Romelu Lukaku goal khatin mualphona a hliah khuh zo lo. Spanish club-in Old Trafford luhchhuahin 2-1 in hnehna an chang. Portuguese manager Mourinho erawh chuan inchhirna a nei lo!

Old Trafford a ngui
Old Trafford-ah goal an mamawh chungin Mourinho-a'n Marouane Fellaini chu bul ṭantu zingah a telh a, goal venhim a ngai pawimawh tih a lang. Attacking football hmuhnawm ti tan goal luh lohna first half a hmuhnawm loh.

Second half-ah Fellaini goal khung tur chu Sergio Rico chuan a dan sak a, Sevilla keeper hian Jesse Lingard a tibeidawng bawk. Minute 60-naa Belgian midfielder thlaktu Paul Pogba-a'n darkar chanve chhungin goal zawnah vawi khat pawh a pet lo a, pass ṭha bik vawi khat pawh a nei lo. United player manto ber French midfielder hi tun hnaiah team tichaktu aiin team tan buaina a ni.

Sevilla manager Vincenzo Montella erawh a khingpui manager aiin substitution a siam fuh zawk a, minute 72-naa tlan lut Ben Yedder chuan minute hnih hnuah a tauh lut nghal a, minute 78-naah French forward hian a goal hnihna a khung leh bawk.

United-in goal hnih an chhuah hnuah quarterfinal thleng turin goal thum an mamawh a, minute 84-naah Lukaku-a'n siphurh sut ṭhen mah se a pawi tur ang a pawi tawh a, result a danglam pha lo.

Inchhirna nei lo
United ṭantute an club ṭan khelh danah an duh khawp an hmu lo a, an au hla pawh 'attack, attack, attack' tih te a ni. Season hnih chhunga pound maktaduai 300 hmang tling tawh Mourinho-a'n supporter-te thil duh a tihhlawhtlin sak thei lo a, a tum hran lo bawk.

Mourinho hian November thla hnuah a vawi khatna atan Fellaini chu inkhel pawimawhah bul a ṭantir a, Belgian midfielder hi a la inpeih lo. Liverpool nena vei lam aṭanga hlauhawm em em Marcus Rashford chu ding lamah awm thungin khelmual ngaiah a hlauhawm nawn lo.

January thlaa Old Trafford pantu Alexis Sanchez chu player naran a ni a, Arsenal hlimna siam ṭhintu player hlawh sang tak hi hi tun dinhmunah chuan United-in an lei sual.

Chile international Sanchez hian Sevilla lakah vawi 42 ngawt ball a hloh, tun season Champions League-ah player mal match khata ball hloh hnem ber a ni.

Jose Mourinho naute khelh danah player hlui Paul Scholes leh Rio Ferdinand te pawhin ṭawngkam an duhtui lo.

Scholes chuan, "Sawifiah thiam pawh a harsa, chak tumna pawh an nei lo. Goal nawr turin theihna chu a nei a, an khelh dan erawh hmuh a hrehawm thung," tiin an khelh dan a sawisel.

Ferdinand pawhin, "Team khata inhre ngai lo dah khawm ang mai an ni. Sanchez hi Arsenal a kan hmuh ṭhin ang kha a ni lo a, player dang zawng pawh an bang chuang lo," tiin lawmna tur a hmu lo.

Hetihlai hian Mourinho erawhin, "Ka theihna zawng zawng ka chhuah a, player-te pawhin an theihtawp an chhuah a, inchhirna tur ka nei lo. Chak kan tum a, ka chak lo a, chu chu football-a thleng ṭhin a ni.

"Champions League-ah helai hmuna ṭhutthlenga ṭhu chung hian Manchester United hi last 16-ah Porto (2004) leh Real Madrid (2013) ka enkawl laiin ka lo hneh tawh a, club tan thil thar a ni lo," tiin an chak lo chu khuk pui hluai tur a nih loh thu a sawi.

Amaherawhchu, Mourinho hian Liverpool nena an inkhel ni loin Sevilla leh tun Inrinnia Brighton and Hove Albion nena FA Cup-a an inkhel tur chu a pawimawh zawk tur thu a sawi a, 'thih leh dam' inkar a nih thu a sawi a, Portuguese manager hi a thusawi aṭanga teh chuan United hi an 'thi' a ni.

United hian Premier League-ah an hmelma Manchester City chu point 16 zeta an phak tawh loh avangin nomawi beisei theih a ni tawh lo a, season liam taa an champion-na League Cup pawh Pep-a hote hian an chawi tawh a, Champions League a an tlak leh takah chuan Jose Mourinho hote hian FA Cup chiah beiseina an nei tawh.

Sevilla an thiam zawk
Sevilla hian Old Trafford an tlawh hma hian England-ah Champions League match-ah hnehna an la chang ngai lo a, season liam ta khan Leicester City hneh loin an tla. Spanish club-in quarterfinal an la thleng ngai lo a, an muala United an chelh hnuah Atletico Madrid (2-5) leh Valencia (0-2) ten an hneh lo a, English club laka result ṭha nei tura ngaih an ni lo.

Hetichung hian Old Trafford-ah an midfielder Steven N'Zonzi leh Ever Banega te hmangin inkhel an thunun a; United midfielder man tam Pogba, Nemanja Matic leh Fellaini te chungah an leng a, an chakna chhan pakhat pawh a ni.

Sevilla manager Vincenzo Montella chuan, "Kan khel ṭha em em a, player tam tak khan an hmalam hun atan inkhel hi a pawimawh tih hriain an theihna zawng zawngin an khel a ni," tiin a naute a fak.

Spanish club bakah hian AS Roma, Juventus, Liverpool, Manchester City leh champion lai Real Madrid te chuan quarterfinal an lut tawh a, nizan khan hmunruak pahnih hnawh khat tur a chiang leh bawk ang. Quarterfinal draw hi Zirtawp tlai dar 4:30 hian Nyon, Switzerland-ah neih a ni ang.