Ferrer hnehtu Del Potro

Juan Martin Del Potro chuan harsatna nei loa David Ferrer hnehin Indian Wells fourth round a lut a, seeded pahnihna Marin Cilic erawh third round lut zo loin a zin kawng a tawp thung.

World number 8 Del Potro hian nimin khan Fererer lakah a zawna vawi nga hnehna a channa ni turin 6-4, 7-6 (7/3) in hnehna a chang. Argentine tlangval hian a hnam pui Leonardo Mayer a hmachhawn leh dawn, Mayer hian Taro Daniel chu 6-4, 6-1 in a hneh.

Kum 29 mi Del Potro chuan, "Ferrer nen hi chuan kan inkhelh apiangin a hautak ziah. Tun ṭumah hian ka khel ṭha hle a, a bik takin tie break-ah khan ka vannei a ni," tiin a sawi.

US Open champion tawh Del Potro hian tun season chhungin vawi 13 hnehna a chang tawh a, ṭu thum dang chu a chak lo thung. Kum 2014 hnua a vawi khat nan January thla khan world number 10 huangah a in vaw kai leh.

Inkhel dangah champion tura rinkai ni phak Marin Cilic chu Philipp Kohlschreiber hmaah 6-4, 6-4 in a tlawm. Tun hnai Grand Slam hnuhnung pathuma final vawi hnih khel thei Cilic hi tun season chhunga a vawi li chak lohna chiah a ni.

Service nei ṭha leh ball vaw na tak Milos Raonic chuan Joao Sousa 7-5, 4-6, 6-2 in a hneh a, Sam Querrey pawhin inkhel inhnehtawk takah Yuki Bhambri chu 6-7 (4/7), 6-4, 6-4 in a hneh bawk.

ATP Masters tournament ngaihhlut pakhatah hian world number 1 hlui Novak Djokovic chu a match hmasa berah a chak lo tawh a, hliam vangin Rafael Nadal a inlan lo bawk.