Mapuia Cricket League : Vawiinah final khel tur a chiang dawn
Mizoram cricket-a inelna ngaihhlut hlawh ber Mapuia Cricket League Qualifier 1 chu vawiin hian khelh a ni dawn a, final lut tur a chiang dawn.
Qualifier 1-ah hian hmahruaitu Chhinga Veng leh pahnihna Zarkawt Lords an inhmachhawn dawn a, chhun dar 12:30-ah eliminator khelh a ni dawn a, champion lai Chanmarians CC leh Kulikawn CC an inkhel ang.
Team thar Zarkawt
Zarkawt Lords-in MCL season ruk khelh tawhah an hmel an la lan vek a, kumin hi playoff an khelh vawi khatna tur a ni. Season hmasaa hneh nei lo team hian tun season-ah vawi khat chiah tlawm hmel an hmu a, nikum nena khaikhian chu team dang daih an ni tawh.
Lords inchhuanna ber chu bowling-ah a ni - Lalrempuia chuan match nga a khelhah over 20 vawmin wicket 13 a la thei a, league round-a wicket la hnem ber a ni. Rempuia hnuaiah wicket kua la thei Zorinliana Sailung a la awm cheu a, Chhinga Veng batsman-te an fimkhur a ṭul ang.
Zarkawt hian run 152 vaw chhuak thei Zahir Uddin an nei tih hriat tel a ṭha bawk.
3C an ropui
Chhinga Vengin match nga an khelhah hnehna chang vekin final an lut a, 3C hian Mizoram cricket-ah match 13 chhung chu tlawm hmel an hmu tawh lo - hmahruaitu nichungin playoff hi an lut.
3C tan batsman K. Vanlalruata chu innghahna a ni a, Durtlang tlangval hian match nga a khelhah ball 212 lek hmachhawn chungin run 237 a siam thei. Bowler nei ṭha Zarkawtin Ruata che ṭha tluang dan an tum ang.
Chhinga Veng tan Hruaimawia Ralte leh Lalnuntluanga ten wicket ruk ve ve lain bowling lamah an innghahna an ni.
Eliminator chu
Champion lai Chanmarians-in tun season-ah beisei an phak lo a, match li an khelhah vawi hnih chiah hnehna chang chungin playoff an lut - pathumna nichungin eliminator an khelh a ngaih phah.
Kulikawn an ropui bik lo, match tawp bera Ramhlun Venglai tlawm zarah net run rate en ngai loin playoff an khel thei dawn hram a, match nga an khelhah vawi hnih chiah chakin vawi thum an tlawm.
Chanmarians-in K. Lalremruata (140 runs) leh Lalhmangaiha (114) te an hmachhuan ang a, Kulikawnin wicket riat latu Laldinthara an neih hi an thlamuanpui ve thung ang.