Vawiinah Super Cup khel dawn

Indian Super League leh I League club-te inelna tur Indian Super Cup qualifier match hmasa ber chu vawiin tlai dar 5:00 hian khelh a ni dawn a, Delhi Dynamos leh Churchill Brothers an intum dawn–inkhel hi Star Sports 1 chuan live-in an pe chhuak ang.

Delhi Dynamos hian ISL-ah season dang aiin an budget an ti tlem a, an result-ah a lang chhuak nghal–match 18 an khelhah vawi nga chiah hnehna changin vawi kua ngawt an tlawm a, pariatnaa awm chunga season kharin qualifier an khelh a ngaih phah.

Mahse, Delhi club hi match 15 leka goal 13 khungtu, Nigeria tana World Cup khel tawh Kalu Uche leh Mizo rawlthar duhawm Lallianzuala Chhangte neitu an ni a, I League-a pakuana dinhmun luahtu Churchill Brothers hneh turin an ṭha tawk.

Churchill hian I League match 18 aṭangin vawi nga chiah hnehna an chang thei a, vawi 11 ngawt an tlawm. Goan club hian Delhi lakah East Bengal striker hlui Willis Plaza leh Congolese striker Siyo Zunapio te chu an chhuan tur an ni dawn a, Delhi hneh tura an ṭhat tawk leh tawk loh zaninah a chiang ang.