Alonso a chawl mai thei?

Formula 1 vawi hnih champion tawh Fernando Alonso chuan tun season hman zawh hnuah intlansiak khawvel chawlhsan tumna a neih thu a sawi chhuak.

Kum 36 mi Alonso hian McLaren car khalh chungin season thum chhung chu beisei a phak lo hle a, kuminah pawh Mercedes, Ferrari leh Red Bull te elphak tur chuan hmasawn an mamawh hle.

Spanish rider Alonso chuan, "Result ka nei ṭha lo a, kan hun tawn ngaihtuah chuan chawlh hun a la ni lo. Chutihrualin Formula 1 kalsanin inelna dang luhchilh turin ngaihtuahna pawh ka hmang ṭhin," tiin season hmasa lama a hmelhriat tawh IndyCar emaw inelna dang zawk hmachhawn thei a nih thu a sawi.

Formula 1 season thar hi tun thla tawp aṭangin tlan ṭan a ni dawn, inelna hmasa ber atan March 25 hian Melbourne-ah Australian Grand Prix tlan a ni ang.