Mangtha Chelsea; Messi a tha lua a ni

"Team pahnih danglamna chu Lionel Messi a ni," tih chu Chelsea boss Antonio Conte-a'n Barcelona an hneh loh hnua a ṭawngkam hmasa a ni a, goal hnih khungtu Messi an ngam lo tih a pha lo.

Nilaini zan khan Chelsea hian Champions League last 16 second leg khel turin Nou Camp-ah Barcelona an lenchilh a, 3-0 ngawtin an tlawm - inkhel hmasa nen belhkhawma an tlawmna chu 4-1 a ni.

Premier League club pangain Cham-pions League last 16 an khel a, a thiam pariat zinga tel phak erawh Liverpool leh Manchester City chiah an ni. Chelsea hma hian Manchester United leh Tottenham Hotspur chuan Europe club inelna sang ber hi an lo mangṭha tawh bawk.

Barca-in a Lal lawm se...
Nou Camp-ah Barcelona fan-ten banner lian zet an tar chhuak a, a thu inziak chu, "Pathianin kan Lal a hruai zel ang," tih a ni a, Messi puala an phochhuah a ni. Argentine forward-in 'Lal' a nihzia pholang turin minute thum bak a mamawh lo.

Messi hian angle chep zet karah Thibaut Courtois-a kap kar a hmu fuh a, hmahruaina goal khung nan a hmang. Minute 20-na a ni a, Messi bawk kan hmu; mual lai aṭangin

Chelsea player a bum phar a, a hnuah Ousmane Dembele tan siamsakin French forward hian an goal hnihna ni turin a khung.

Argentina captain-in minute 63-naah Courtois-a kap karah bawk thawlhin chak nemnghehna goal a khung - Chelsea tan tih theih a awm tawh lo.

Khawvela ṭha ber?
Messi-a'n Chelsea laka goal hnih a khung khan Champions League-ah goal 100 a khung tling ve chiah a, Europe club inelna sang bera heti zat goal khung tur hian match 123 bak a mamawh lo. Goal 117 khungtu Ronaldo aiin goal 100 khung tling tur hian match 14-in a mamawh tlem zawk.

Chelsea boss Conte chuan, "Khawvela player ṭha ber chungchang kan sawi a ni," tiin Messi a fak a, "Season tinin goal 60 chuang a khung a, player ṭha chungchuang bik a ni a, goal hmaah Barca kha an hriam em em a ni," tiin an khingpui team a fak.

Barcelona-in coach Ernesto Valverde enkawlna hnuaiah treble champion nih an hnaih zel - Copa del Rey final an lut tawh a, league-ah tlawm hmel la hmu loin point riat ngawtin hma an hruai fal tawh bawk.

A fair lo?
Chelsea-in goal thum chhuah mah se inkhel result aṭang ringawtin Blues khelh dan hi teh theih a ni bik lo. London club tan Marcos Alonso chuan freekick hmangin post a pet per a, a chance neih ṭha dang chu Marc-Andre ter Stegen-a'n ṭha zetin a dang bawk–N'Golo Kante chance neih a uiawm takzet bawk.

Hei mai a ni lo. Alonso chu penalty area-ah Gerard Pique chuan a titlu a, Premier League champion-in penalty hmuh inbeisei mah se referee berin spot kawhna turah a ngai lo.

Chelsea manager Conte chuan, "Kan inkhel kha in en chuan result kha a fair tawk lo tih in hmu thei ang. 3-0 ngawta tlawm hi kan phu lo a, kan vanduai a ni. Chance tam tak kan insiam a, mah se kan chhawr miau si lo," a ti.

Mangṭha Conte?
Champions League aṭanga petchhuahin Chelsea an awm a, Conte hma hun chungchangah zawhna a awm nghal. Premier League champion hian league lamah nomawi chawi an beisei ngam tawh lo a, palina huangah season an khar thei kher ang em tih pawh a chiang tawh lo.

London club hi table-ah pangana an ni mek a, palina Liverpool chu point li a phak lo mekin Reds leh Spurs an la hmachhawn dawn bawk. Kum 48 mi manager hian thla hmasa lawk khan Stamford Bridge-a cham zel a duh thu sawi mah se, 2019 thleng contract nei manager hi zângnadawmna nen chhuahtir a ni zawk a nih pawhin a mak lo ang.

Italian manager erawhin chhuak tur angin ṭawngkam a la nei lo. Juventus boss hlui chuan hmalam hun thlirin, "Ka naute khelh dan kha ka chhuang a, an theihna zawng zawng an pe a ni. He rilru pu chung hian kan beih chhunzawm zel ka beisei," a ti.

Thiamna reng nei lo!
Messi-a'n Chelsea goalkeeper Thibaut Courtois ke karah vawi hnih ngawt goal a khung a, Belgian keeper a in thiam thei lo. Kum 25 mi si ban nghaktu chuan, "Petchhuah nih hi kan phu lo a, mahse mimal tihsual kan tuar a ni.

"Khatiang angle tight-ah khan Messi-a'n a shot duh ka ring lo a, mahse kar awl hmu fuhin a pet thung si. Ka harhchhuah meuh chuan a lo tlai lutuk tawh a ni. Goalkeeper chak lohna lai ber chu kan kap kar a ni a, a hrehawm takzet. Mahse, biru reng thei ka ni lo a, pa taka engkim hmachhawn a ngai," a ti.

Chelsea wing-back Marcos Alonso chuan, "Player ṭha tak tak an neih avangin metre khat lek pawh hmun awl pek an thiang lo a, anni ang team chuan chance siam nan an hmang hman zel a ni," tiin a sawi ve bawk.

Vawiinah quarterfinal draw
UEFA Champions League quarterfinal draw chu vawiin tlai tlai dar 4:30 hian UEFA hmunpui Nyon, Switzerland-ah neih a ni dawn.

Champion lai Real Madrid, Barcelona, Bayern Munich, Juventus, Liverpool, Manchester City, AS Roma leh Sevilla te chu a sang pariatah hian an tel a, Ukrainian footballer ropui Andriy Shevchenko-a'n draw hi a kaihruai ang.

A sang pariat chinah hi chuan eng team pawh an inhmachhawn thei tawh a, ram khat club pawh inhmachhawn thei tawhin El Classico pawh a thleng thei tawh tihna a ni. Quarterfinal first leg hi April 3-4 ah khelh a ni ang a, second leg hi April 10-11 ah khelh tur a ni.