Commonwealth Games India aiawh tur Lalremsiami

Hockey India chuan Commonwealth Games neih huna India hmeichhe hockey team tur hming a puang a, player 18 thlanchhuah zingah Mizo tleirawl Lalremsiami a tel.

Commonwealth Games 2018 hi April 4 aṭangin Gold Coast, Australia-ah neih a ni dawn. India hmeichhe team hi Pool A-ah Malaysia, England, South Africa leh Wales te nen dah khawm an ni.

Kolasib tleirawl duhawm Siami chuan, "Korea aṭanga kan rawn haw hnu khan Bangalore-ah camp kan nei chhunzawm leh nghal a, India aiawh tura puan zinga ka hming a lang ve hi ka lawm takzet," tiin Vanglaini a hrilh.

Women's Asia Cup 2017 champion India hian tun thlatir khan South Korea-ah tour an nei a, he hunah hian Kolasib tleirawl Siami hi match nga an khelhah inlan kim vekin goal thum a khung. Heng zingah hian an match hmasa bera si khat faia an chakna goal pawh a tel a ni.

Nikum November thlaa India-in Asia Cup a chawi theih nan pawh khan Siami hi a thawhhlawk tawh hle. Thenzawl Women Hockey Training Centre aṭanga zir chhuak hi match zawng zawngah inlan vekin goal hnih a khung thei.

Sports and Youth Services (SYS) coach Lalrampari leh Lalroṭhuami (Bte-i) te kaihhruaina hnuaiah Mizo tleirawl ten hockey huangah hma an sawn chho mek zel, India tana inlan phak tam tak chher chhuak tawhin Rio Olympic-ah pawh han Lalruatfei Hnialum chu India team-ah a tel tawh a ni.

India Squad
Goalkeepers: Savita Punia (VC), Rajani Etimarpu

Defenders: Deepika, Sunita Lakra, Deep Grace Ekka, Gurjit Kaur, Sushila Chanu Pukhrambam

Midfielders: Monika, Namita Toppo, Nikki Pradhan, Neha Goyal, Lilima Minz

Forwards: Rani Rampal (C), Vandana Katariya, Lalremsiami, Navjot Kaur, Navneet Kaur, Poonam Rani