Federer a la chak vek

Roger Federer-a'n kumin chhungin hneh loh a la tawng lo. Swiss star hian nimin khan Jeremy Chardy hnehin a vawi 12 nan Indian Wells Masters quarterfinal a lut.

World number 1 Federer hian darkar khat leh minute 22 chhung lekin 7-5, 6-4 in hnehna a chang a, tun season chhunga vawi 15 hnehna a channa chiah a ni.

Kum 36 mi Federer hian nikum khan Australian Open a chawi hnuah Indian Wells leh Miami-ah te a champion zui, kuminah pawh Grand Slam hmasa berah hlawhtlinna chang leh tawhin Masters 1,000 title la turin match thum bak chak a mamawh tawh lo.

Inkhel dangah Chung Hyeon chuan seeded 30-na Pablo Cuevas chu 6-1, 6-3 in a hneh ve bawk a, South Korean tlangval leh Federer te hi vawiin chawhma lam hian semifinal luh inchuhin an inkhel leh nghal ang. Player pahnihte hi Australian Open semifinal-ah khan an intawng tawh a, Federer-a'n hnehna a chang.

Thli thaw tak hnuaia inkhel dangah Borna Coric chuan 6-2, 6-7(6-8), 6-4 in khawltual player Taylor Fritz a hneh a, Kevin Anderson pawhin Pablo Carreno Busta chu 4-6, 6-3, 7-6 (8/6) in a hneh bawk.