Mapuia Cricket League : Chhinga Vengin final an lut
Mizoram cricket-a inelna ngaihhlut ber Mapuia Cricket League-ah final khel pakhat a chiang ta. Chhinga Veng chuan nimin khan Qualifier 1-ah Zarkawt Lords chu wicket ruka hnehin final an lut.
3C-in final an luh laiin champion lai Chanmarians erawh petchhuahin an awm - Kulikawn chuan Chanmarians hi eliminator aṭangin an vaw chhuak a, run 10-in an hneh.
Qualifier 1-a chakin final an lut nghal a, eliminator-a chak zawk team hian qualifier 1-a chak lo zawk hi qualifier 2-ah hmachhawn lehin a chak zawkin final khel turin Chhinga Veng an zui ang.
Lords an thamral
Zarkawt Lords-in MCL-ah a vawi khat nan playoff an in vaw kai a, season danga kan hmuh ṭhin Zarkawt Lords kha an ni lo. Mahse tun hnaia Mizoram cricket thununtu Chhinga Veng hmaah meuh chuan Lords an ṭha tawk lo.
Suaka Cricket Ground-a inkhelah Zarkawt an bat hmasa zawk a, over 19.2-ah run 106 chauh siamin wicket an hloh fai vek! 3C tan awlsam taka umphak theih tur angin lang mah se an bat ṭantir lamah beisei an phak bik lo a, an innghahna K. Vanlalruata pawh run kua chiah siamin a out.
Mahse, Lords phur vanglai takin Gaurav Singh a inlar a, run 39 vaw chhuaka a tawp thleng damin 3C hi hnehna a rawn chanpui - wicket hnih latu Lalnuntluanga'n run 24 siamin a pui ṭha viau bawk a, over 18-ah an target umphaa wicket li chiah hlohin an chak.
Bye bye Chanmarians
MCL vawi hnih champion tawh Kulikawnin harsa takin playoff lut mah se a hunah tak team ṭha an la ni reng tih an pholang a, nimina eliminator inkhelah champion lai Chanmarians chu run 10-in an hneh.
Eliminator inkhela bat hmasa zawk Kulikawnin hma takah opener Lalzuithanga chan mah se captain C. Lalrinsanga (48) leh Parvez Ahmed (44) te an chet ṭhat avangin over 20-ah run 130 an tlin a, wicket ruk chiah an hloh.
Chanmarians tan innghahna Lalhruaizela (6 runs), captain K. Lalremruata (8) leh Pritam Gurung (4) ten beisei an phak loh avangin Lalmuanzuala (37 runs) leh Lalhmangaiha (21) chet ṭhatin awmzia a nei lo a, Kulikawn all rounder Lalzuitluanga'n wicket thum rawn la bawkin over 20-ah run 120 chiah tlina wicket kua hlohin an tlawm.
Inkhel Result
Qualifier 1
Zarkawt Lords 106/10 (19) bt Chhinga Veng 107/4 (18.2)
*Wicket rukin Chhinga Veng an chak
Eliminator
Kulikawn 130/6 (20) bt Chanmarians 120/9 (20)
*Run 10-in Kulikawn an chak
Naktuk Inkhel Tur
Qualifier 2
10:30AM Zarkawt Lords vs Kulikawn CC
*LPS 1-ah live-in pekchhuah a ni ang.