Saints manager thar Mark Hughes

Premier League table mawng lama talbuai lai Southampton chuan an manager thar atan Mark Hughes an lalut, Stoke City manager hlui hian tun season tawp thleng daih contract a ziak.

Saints hi relegation zone aṭang­in an la him chiah, mah se Mauricio Pellegrino chungah rinna nghat zui ngam loin Thawhṭanni khan an ban. Pellegrino kaihhruaina hnuaiah hian match 17 khelin vawi khat chiah hnehna an chang - league match riat bak khelh tur an nei tawh lo.

Kum 54 mi Hughes pawh hian tun hnaiah sulhnu a nei ṭha lutuk hran lo. Kum li leh a chanve a lo enkawl tawh Stoke nen Janaury thla khan an inṭhen, Potters hi relegation zone a awm chungin a kalsan a ni.

Player a nih laiin Hughes hian Southampton bakah Manchester United, Chelsea leh Barcelona tan a khel tawh. Manager hna a thawh hnuah pawh Blackburn, Manchester City, Fulham, QPR leh Stoke te enkawl tawhin Premier League match 445-ah a naute a kaihruai tawh.

Welsh manager Hughes chuan, "Premier League-ah tawnhriat ka nei hnem tawh a, hnehna chan dan thuruk pawh ka hria. Kan tum ber chu season thara English league sang ber khelh chhunzawm a ni, kan beiseina a hlawhltin ngei ka ring," tiin Saints chu EPL-ah in ham­tanpui theih a beisei thu a sawi.