Saina a chak lo nghal

All England Open Badminton Cham­pion­ship khelh ṭan a ni a, Indian shuttler Saina Nehwal chu a match hma­sa berah a chak lo nghal. Kidambi Srikanth, PV Sindhu leh HS Pran­noy te erawhin an khingpui ṭheuh an hneh thung.

Birmingham, Eng­land-a inkhelah Saina hi world number 1 leh cham­pion lai ni bawk Tai Tzu-Ying lakah 14-21, 18-21 in a chak lo. Tai­wan star lakah hian a zawnin match riat chhung zet a chak lohna a ni ta.

Inkhel dangah Ki­dambi Srikanth chu Brice Leverdez hmaah 7-21, 21-14, 22-20 in a chak hram. Beisei aiin Praneeth-a'n bul a ṭan fuh, a khingpui Chou Tien Chen chu 9-21, 21-18, 21-18 in a hneh. India tlangval dang Sai Praneeth erawh Son Wan-Ho lakah 21-13, 15-21, 11-21 in a chak lo thung.

Hmeichhe singles lama India-in medal dawn a beiseina PV Sindhu chuan Thailand nula Pornpawee Chochuwong chu 20-22, 21-17, 21-9 in a hneh ve thung.

Super Series Pre­mier zinga pakhat All England-ah hian kum­inah lawmman atan Rs 6,48,70,500 zet sem chhuah a ni dawn. Indian suttler zingah Prakash Padukone (1980) leh Pullela Gopichand (2001) te chiah an la champion thei a ni.