PSG tan nomawi a hnai ta

Kylian Mbappe goal hnih hmangin Paris Saint-Germain chuan Angers 2-1 in an hneh a, Unai Emery naute hian AS Monaco lakah point 17 zeta an san fal tawh avangin Ligue 1 nomawi an chawi teuh tawh hle.

PSG hian point 80 an hmu tawh a, league match khelh hmabak pariat an la neih aṭangin point 11 bak hmuh belh an mamawh tawh lo; Pathianni zanah Nice an lenchilh leh ang.

Nilaini zan inkhelah season hmasa Monaco champion puitu Mbappe-a'n Julian Draxler siamsak hmangin PSG tan minute 12-naah goal hmahruai a khung, goal an neih aṭanga minute li hnu lekah midfielder Thiago Motta chu hnawhchhuah a ni.

Tun hnaia khel ṭha tak Angel Di Maria thawhrah rengin Mbappe bawkin an goal hnihna a khung, France international hian a club tan tun season chhungin goal 19 a khung tling ta.

Hun tawp hma minute 15 chauh a awm tawh tihin Karl Toko Ekambi chuan goal khat dang khung ve mah se, goal dang a lut zui lo a, Paris club hian tun season chhungin an khelmuala league match an khelh zawng zawngah hnehna an chang vek.

PSG manager Unai Emery chuan, "League nomawi chawi kan duh a, a ti hlawhtling turin kan khel chhuak bawk. Season tluanin kan khel ṭha a ni tih lantir nan champion ngei a ngai, ka naute pawhin an theihtawp an chhuah vek a ni. Minute 75 chhung player 10 ni chunga kan khel pawha hnehna kan chang thei hi a ropui hle," tiin a sawi.