Bengaluru FC tan Gurpreet a rinawm

Indian Super League final khel tur Bengaluru FC goalkeeper Gurpreet Singh Sandhu chuan South Indian club-ah rinawmna thu a tiam nawn a, kum nga dang khelh chhunzawm turin contract thar a ziak.

Kum 26 mi goalkeeper hi Norwegian club Stabaek-ah kum thum a cham hnuin Bengaluru chuan ISL season ṭan dawn khan Europe aṭanga Indian player lei hmasak ber ni turin Stabaek aṭangin Punjab keeper hi an lei chhuak.

India international hi a hlawh zat chiang taka tarlan ni lo mah se Bengaluru-in an leichhuah khan a man leh hlawh zat atana an insen zat chu nuai 150-180 inkar nia ngaih a ni a, Indian keeper hian season khatah nuai 120-150 inkar a hlawh tura ngaih a ni.

ISL-a Indian player zingah Sunil Chhetri chu hlawh hnem ber ni mekin India captain hian season khatah nuai 150 a hlawh mek a, pahnihna Mizo tlangval Jeje Lalpekhlua chuan nuai 130 a hlawh mek bawk. Hnahthial tlangval hian a khelh ṭhat dan a zirin season khatah nuai 10 a dawn belh ṭhin ang.