ISL final: Bengaluru FC vs Chennaiyin FC Goal khung a, champion ka tum - Jeje

Zanin dar 8:00-ah Indian Super League final khelh a ni dawn a, a vawi khat nana ISL khel Bengaluru FC leh vawi khat champion tawh Chennaiyin FC an inhmachhawn dawn.

Chennaiyin striker rinrawl Jeje Lalpekhlua chuan, "Bengaluru lamah goal khung ngei tumin ka khel dawn a, champion turin Bangalore kan pan dawn a ni," tiin Vanglaini a hrilh a, kut ruaka haw a tum lo.

Bengaluru-in an season hmasa berah ISL-a point 40 hmu tling thei hmasa ber nichungin playoff an lut a, semifinal-ah Pune City hnehin final an lut zui - an khelhna tur hmun hi an khelmual hmanthiam Sree Kanteerava a ni.

Zinkawng ngaihnawm
Bengaluru-in a vawi khat nan ISL khel mah se I League-a tawnhriat nei tawh sa team an nih avangin an talbuai lo a, Albert Roca hoin season duhawm tak an hmang. League match 18-ah vawi 13 hnehna changin vawi khat an tlawm a, vawi li an tlawm zingah an khelmualah Chennaiyin an hneh loh chu a tel.

Mizo tlangval Jeje chuan, "Bengaluru hi an khelmuala final khel tur an nih avangin kan hlau lo a, keini aiin pressure an nei sang zawk dawn tihna a ni. League round-ah khan kan khelmualah kan lo hneh tawh bawk a, hlauhthawnna nei miah loin Inrinni zanah kan lenglut ang," tiin Vanglaini a hrilh.

Chennaiyin hian league match 18-ah vawi kua hnehna changin vawi li bawk an tlawm a, an hneh loh zingah Bengaluru an tel ve tho - khualmuala an ngam hnuah an khelmualah an hneh lo a, zaninah team pahnih an incho tawk khawp ang.

J&J
Chennaiyin-in Mizo pahnih Jeje leh Jerry Lalrinzuala an nei a, player pahnih hian hmun pawimawh an chang. Jeje-a'n match 20 khelh tur awm aṭangin match 19 a khel a, goal kua a khung.

Hnahthial tlangval chuan, "Ka duhna hmunah tak mal tlattir ka ni a. Foreign player ṭha kan nei chungin coach-in ka chungah rinna a nghat tlat a, hei hian nasa takin min ṭantir lehzual a ni. Team dang en ila, striker tur chuan foreign player zel an ring a, khelhtir an nih pawhin striker position dik takah khelhtir an ni ngai lo," tiin coach rinnain a tih phur thu sawi.

Jeje rualin Jerry pawimawhna hmuh hmaih theih a ni lo. Bethlehem Veng rawlthar hian match 20 aṭangin match 19 a khel a, vawi sarih Emerging Player of the Match-ah thlan niin vawi khat chu Hero of the Match-ah thlan a ni bawk.

Jeje vs Chhetri
Indian football sawi a nih apiangin Bhaichung Bhutia hming lamrik a ni ṭhin a, Sikkimese striker-in inkhelh a chawlhsan dawna zawhna chu, "Tu nge Bhaichung thlak ang?" tih a ni. Chhetri a lo lang a, Bhutia ngaihawmna tibo ṭhak khawpin Indian football ngaingatute mit a titlai.

Chhetri dawta Indian football hmel lanna tura beisei chu Jeje a ni a, zanina Chhetri leh Jeje intawng tur hi 'Present vs Future' tih ang zawng pawha thlir theih a ni. Kum 33 mi a nih tawh avangin Chhetri-a sulhnu a ropui a, kum 27 mi Jeje-a khelh dan enin Chhetri ropuina thaibo turin a ṭha tawk.

Tun season ISL bikah Jeje-a'n goal kua khungin match khata 0.47 goal khung zel ang a ni a, Hero of the Match-ah vawi thum thlan niin December khan Fans' Player of the Month-ah thlan a ni bawk. Sunil Chhetri-a'n Hero of the Match chawimawina vawi li a dawng a, match 20-ah goal 13 khungin match khata goal 0.65 zel khung ang a ni.

In ang lo in hal si
Bengaluru hi Federation Cup champion an nih avangin ISL bakah AFC Cup an khel tel a, match 15 chhung chu tlawm hmel an hmu tawh lo. Bengaluru hian Nilaini zan khan AFC Cup-ah Abahani Dhaka chu 1-0 in an hneh a, Daniel Lalhlimpuia'n goal awmchhun hi a khung.

Chennaiyin-in match sarih chhung tlawm hmel an hmu tawh lo a, an inchhuanna chu tlarhnung a ni - an match hnuhnung pasarihah hian goal thum chiah an chhuah. Bengaluru-in goal khung turin Sunil bakah goal 14 khungtu Venezuela international Miku an nei tel a, Chennai tlarhnunga Portugal international hlui Henrique Sereno, Brighton defender hlui Iñigo Calderón leh Jerry te ho inkawp pal darh an tum tur hi a hmuhnawm khawp ang.

Jeje chuan, "Semifinal-a Bengaluru hmachhawn kha kan chak tawh zawk a, final-a kan tum thei tur hi kan lawm khawp mai. An mual ngeia hneh chunga nomawi chawi hi kan châk a ni," tiin Vanglaini a hrilh.