FA Cup-a inlan tur United leh Chelsea
UEFA Champions League-ah Manchester United chu Spanish club vantlang Sevilla hneh loin an tla a, Chelsea-in Barcelona lakah goal thum chhuahin Europe-ah beisei tur an nei tawh lo. English club pahnih tan FA Cup quarterfinal hi UCL-a an mualphona hliahkhuhna hun ṭha a ni ang.
Zanin dar 5:45 hian Liberty Stadium-ah Swansea City leh Tottenham Hotspur ten quarterfinal match hmasa ber an khel ang a, zan dar 1:15-ah Manchester United leh Brigton & Hove Albion ten an chhunzawm ang.
Pathianni zan dar 7:00-ah Wigan Athletic leh Southampton te an inkhel ang a, zan dar 10:00-ah Leicester City leh Chelsea ten King Power Stadium-ah match hnuhnung ber an khel ang.
Kane tel loin
Tottenham striker Harry Kane chu inhliam vangin thla khat chhung a inlan thei dawn lo a, Mauricio Pochettino hoten Swansea lakah fiahna an hmachhawn ang.
Argentine boss Poch-a chuan kum 21 mi Dele Alli chu a kum rualpuia ṭha ber zinga mi niin a sawi a; Christian Eriksen, Son Heung-min leh Fernando Llorente te an kawl avangin Welsh club lakah Kane-a awm loh tuar tur an ni lo.
Amaherawhchu, Swans-in manager Carlos Carvalhal hnuaiah harhtharna an chang a, Liberty Stadium-ah phei chuan an chak loh hnuhnun ber chu January 3 daih tawh kha a ni a, hemi hnu hian Liverpool leh Arsenal te an hneh leh tawh bawk.
Thochhuah tum United
Manchester United-in Sevilla laka an chak loh hnuah thochhuah ngei an tum a, Brigton & Hove Albion laka an tho chhuak nghal lo a nih chuan kumin chhunga an nomawi beiseina a tawp ang.
United khelh hun hi zan lai a ni a, hei hi 2019/20 season atana zan lama inkhelh enlawkna a ni a, Jose Mourinho hote hian Krismas hma niah Leicester City chu zan laiah an hmachhawn tawh bawk.
A hmuhnawm dawn
Chelsea-in Mourinho hnuaia an league nomawi lak chu Leicester City lakah an chan a, Antonio Conte kaihhruainain Blues hian Foxes hi an chhuhsak leh.
Tun hnaia Premier League chawi thei club pahnih hi tun season-ah erawh beisei a pha lo a, FA Cup chiah hi an nomawi beisei a ni ta. Leicester City-in an champion ṭuma player pawimawh Jamie Vardy leh Riyad Mahrez te an la chelh theih avangin London club tana pal zut theih an ni lo.
Chelsea-in midfielder ṭha N'Golo Kante leh Danny Drinkwater te an chhuhsak thung a, French midfielder hian London club-ah pawh hmuh pawimawh a chang. Italian manager Conte hote hian match hnuhnung paliah Manchester khaw club pahnih bakah Barcelona te an hneh lo a, an nomawi beiseina chhem nung turin insiamṭhat an mamawh hle.