Match 16 chak tawh Federer

Roger Federer chuan Chung Hyeon hnehin Indian Wells-ah semifinal a lut a, tun season chhungin vawi 16 hnehna a channa chiah a ni a, tennis a khelh hun chhungin season bul a ṭan fuh ber ṭum a tawng leh mek.

World number 1 Federer hian South Korean tlangval Chung hi darkar khat leh minute 23 chhungin 7-5, 6-1 in a hneh. Kum 2006 season khan Federer hian a match hmasa 34 zinga 32-ah hnehna a chang thei a, he mi kum leh tun season hi a bul ṭan ṭhat ber ṭum a la ni.

Kum 36 mi Federer hian final lut tur chuan Borna Coric a paltlang leh phawt a ngai dawn. Quarterfinal inkhel dangah Coric hian Kevin Anderson chu 2-6, 6-4, 7-6 (7-3) in a lo hneh ve bawk.

Swiss star Federer hi Indian Wells-ah hian champion lai a ni a, kuminah hian a vawi ruk nan a champion thei a nih chuan sulhnu hnutchhiah ṭha ber a ni ang.

Season hmasa khan Federer hian Australian Open bakah Indian Wells leh Miami Masters title a la thei a, kuminah pawh a sulhnu ngai a chhui chho mek.