Zarkawt BCA-in Khatla TBL an ngam ta
Mizoram Super League season lina inkhel awm tawh zinga la hmuhnawm berah Zarkawt BCA chuan Khatla TBL chu 71-67 in an hneh a, best of three series 2-1 a lain final an lut. Ningani zan semifinal game 3 aia hmuhnawm a awm dawn a nih chuan MSL4 final-a BCA leh Tuikual South te inkhelh hunah a thlen a ngai tawh ang.
Nomawi inchuhna game hmasa ber hi Hawla Indoor Stadium-ah March 20, Thawhlehni zanah khelh ṭan a ni dawn a, best of three a khelh tur a ni. Kumin hi final-a TBL an inlan loh vawi khatna tur a ni a, Zarkawt BCA-in MSL hmasa ber hnua an final vawi khat thlenna a ni bawk.
An inngam
Zarkawt BCA coach Lalruatfela'n game khelh hmain fitness chauh ni loin rilru nen lam an inpeih tawh thu Vanglaini a hrilh a, hei hi ṭan phat aṭangin a lang nghal.
Game 2-ah BCA guard Zonununsanga'n TBL innghahna H. Laldinsanga a ngam tawk lo a, game 3-ah erawh Zonuna hian veteran player hmaah hian timna eih a nei tawh lo a, an infuih ṭha tih a lang.
Intluk tawk
BCA-in Matthew Sailo hmangin hma an hruai nghal a, TBL lam hian vawi 13 zet an lehthal thei a, amaherawhchu Zarkawt BCA hi an tho chhuak vek.
Game 3-ah hian ṭum ruk zet an point hmuh zat a inang a, an intluk tawk tih hi an point hmuh chhoh danin chiang takin a lantir a, second 5.6 chauh la awma Zarkawt tlangval Matthew-a'n freethrow a luh ve ve hnuah chak tur a chiang.
An thiam
Mizo hlanga khelh ni mah se a hmuhnawmna a nep chuang lo a, MSL history-a inkhel hmuhnawm ber zinga chhiar theih a ni tih hi Hawla Indoor Stadium khat tlata mipui pungkhawmin an pawm ang.
BCA passing game tifamkim tura Lalrina Renthlei-in a hmuhnawmna tur an belh zeuh zeuh te chu entute mit tlaitu a ni a, Khatla TBL lam pawhin mipui tiphur thei tur an siam ve reng bawk.
Quarter hmasa bera TBL guard Vanlalṭhazuala ball pek Eddie Zaithanmawia luh (alley-oop) hmutute chuan hmuhnawm thlir leh beiseiin basketball inkhel an en phah fo ang.
Rising star Reema
MSL hmasa lamah pawh Lalremsanga hmel hmuh tur a awm tawh lo a, match liah lansarh a la nei lo. BCA coach Afela'n huaisen takin Reema hi bul a ṭantir a, Ramthar tlangval hian coach lawmna a siam sak.
Reema hian point kua a nei a, fourth quarter-a basket vawi thum (6 pts) a neih chu BCA chakna chhana chhiar theih a ni a, final-ah pawh Lalrina Renthlei (16), Matthew Sailo (15) leh Zonunsanga (13) te huangah awmin en bik zingah a tel tawh ang.
Freethrow a pawimawh
Khatla TBL-in game 2-ah freethrow vawi 20 aṭangin vawi 16 an lut a, 80% zet an lut. Game 3-ah phei chuan TBL hian vawi 14 an hmuh aṭangin vawi 12 an lut a, 85.71% an lut tihna a ni.
Freethrow an luh ṭhat em avangin TBL-in BCA an elpha a, amaherawhchu Zarkawt club-in freethrow an pe ṭha duh lo a, an tifuh hle. Hetihlai hian BCA erawhin vawi 34 zet freethrow an hmu a, vawi 19 chauh lutin 55.88% lut pha mah se TBL fimkhur tawk loh avangin freethrow aṭanga an luh zat hi a la tam tho.
Zarkawt player Dennis Lalmuanpuia tan zan ṭha a ni lo a, point ruk lek a luh zanah a freethrow hmuh vawi 14 aṭangin vawi li chauh a lut. Hun tawp lamah insiam ṭha lo se chuan BCA chak loh chhanah puh theih a ni ang a, amaherawhchu final-ah erawh rinrawl zingah a awm leh tawh ang.
Referee thutlukna
Second 44.5 chauh a awm tawh tihin BCA guard Zonuna freethrow vawi hnihna a lut lo a, Zarkawt lam hian ball chang lo mah se nasa takin pressure an pe a, MSL1 MVP Mapuia'n a vawm out phah. TBL lamin foul-ah ngai mah se referee thutluknaah chuan BCA ball a ni thung.
Hetihlaia an inthlauhna hi point hnih chauh a ni a, MSL2 MVP Vanlalmuana'n BCA palian pahnih Dede-a leh Matthew te inkarah lakluh tum mah se an chhuhsak a, TBL foul-a an ngaih hi referee lamin an ṭawmpui lo.
Second 5.6 chauh a awm tawh tihin Matthew-a'n freethrow vawi hnih a lut a, an inthlauhna hi point liaah kai chhoin Khatla TBL tan thawhchhuah ngaihna awm tawh lo. Inkhelh banah TBL aiawha ding Vanlalnunsanga (Lana) chuan national referee leh tualchhung referee an la danglam thu a sawi a, a lungawi lohna a thup zo lo.
BCA pawhin lawm lohna tur an nei tho a, BCA guard Zonuna tih out ni miah loah referee lamin an thutlukna thlakin TBL zawk inbound an pe a, hei minute 3:30 la awma thil thleng an nih avangin inkhel tidanglam thei tak a la ni.
Puitling takin
TBL-in second 5.6-ah point li an lut thei tawh lo tih hriain Mapuia'n amah vengtu Lalrina chu sut tlang tum tawh loin a kut a lek chhuak a, an inchibai rualin hun a tawp zui nghal.
Zarkawt BCA coach Afela chuan, "Pathian vang liau liau a ni. TBL lamin inhliam vangin harsatna an nei a, keini erawhin inhliam vanga buaina kan nei lo. Kan tih theih bak a ni a, Pathian venna vang a ni," tiin a sawi.