Giggs-a'n Ramsey a ko lo

Wales manager thar Ryan Giggs chuan 2018 China Cup khel tur an ram squad a puang a, Arsenal midfielder Aaron Ramsey hming a tel lo. Real Madrid forward Gareth Bale erawh inlan tur zingah a tel thung.

January thla khan Giggs hi an ram team enkawl tura lakluh a ni a, tun ṭum hi squad a puan vawi khatna a ni. Ram tana la inlan ngai lo defender Chris Mepham, Connor Roberts leh midfielder Billy Bodin te chu a ṭum khat nan koh an ni.

Kum 27 mi Ramsey hi kuminah hliam vangin a chawlh a ngai fo, Ningani zan khan Arsenal leh AC Milan te inkhelh ṭumin a inlan thei a, khelmual chhungah minute 90 chhung hun a hmang.

Amaherawhchu, Giggs-a'n a player hi chawlhna hun pek a duh, "A tan chuan chawlh hun a ni, kan ram leh Aaron-a nakin hun tur ngaihtuahin tunah hian a chawlh rih a ngai," a ti a, squad a puan hma hian Ramsey leh Arsenal nen inbiakna an neih thu a sawi tel bawk.

Wales tan hian Everton defender Ashley Williams chu captain a ni zui dawn, Liverpool goalkeeper Danny Ward an koh loh chhan chu visa a fel loh vang a ni thung.

Wales hian March 22-ah China an hmachhawn dawn a, March 26-a an khelh tur zawk a la chiang lo–Uruguay emaw Czech Republic emaw an hmachhawn leh dawn a ni.